Чна варар ахъайнай

  Чи девирдин жегьилрин студентвал чилин  ругуд паюникай са пай кьунвай СССР лугьудай гьукуматди залан — залан каш язавай бередиз аватнай. Заз и гьукуматдин хъсан — пис патарикай рахаз кIанзавач. А чIавуз и чIехи гьуькумат ргазвай, гар са патахъай цIай кутунвай къачгъан хьиз тир. А какахьай аямда гьар са инсан чиликай цIийиз хкатна, вичи — вич юзурзавай, мягьтIелдиз кьуд патаз вил вегьизвайди хьиз амукьнавай. Такур, кьилиз гъиз тежер затIар вилералди аквазвай.
Яваш — яваш, кичIез — кичIез, циферикай пIипI аквазвай ракъинин цIелхемрикай чим къачуна «Самур» медениятдин макан арадал атун, сифте яз гьа и тIвар алай газет акъатун, лезги студентрин шиирдинни манидин нянияр, фехри хиябанда майдин кIуьдаз генерал Магьмуд Абилован сурал фидай мярекатар кьиле тухун чаз акунай.

1989-йисан са зулун ряденихъ Ленинан тIварунихъ галай АПИ-дин студентар тир зунни Зиядхан Мурадханов Дернегуьлда студентрин шегьерда ацукьна чай хъвазвай. Сифте яз и касди заз, ша чна лезги студентрин дем туькIуьрин лагьанай. Инлай чна чи гадайрин патав лув ганай. А чIаван студентар тир Абдулазиз Алиханов, Камран Къурбаналиев (Ялама), Адил Алиев (Уьнуьгърин уба), Билал Адилов (СтIур), Къудрат Мегьдиев , Режбил Гьуьсейнов (Ясаб), Мафик Садиров (Уьнуьгъ), Мегьамед Новрузбеков (Мучугъ), Решид Агъарегимов (Кузун къишлах), Этикъад Велиметов (Кчан) ва гьак1ни цIудралди кьегьалрин чIехи зегьметдив чи межлис кьиле фенай.

 1989-йисан ноябрдин 22-аз саки вири Дернегуьл лезгидал рахазвай. Бакудин вири ВУЗ-ра кIелзавай лезги студентар чIехи залда кIватI хьанвай. Гьар ВУЗ-диз вичин столар, гар са студентдизни «эверун», гьар са столдизни вичин тIварар авай.

Кцарин културадин кIвалин «Кард» ансамблдини нянидал абур гъанвай.

Няни АПИ-дин студент Зиядхан Мурадханова кьиле тухузвай. Са — са столдиз гаф гузвай. Хайи чIалал кьиле физвай и мярекат асул дем, сувар тир.

Столрал студенрин жибинриз килигай тIуьнар-хъунарни алай. Спирт квайбур галачиз.

Медицинадин Унверситетдин студент Мафик Садирова виридан рикI ифирдай жуьреда са «Шагьсалем» манини лагьанай. Гзаф жегьилар гьанал таниш хьанай. Хзанар туьк1урна къенин юкъузни бахтлудаказ уьмурзавайбурни ава.

СССР-дин ВУЗ-рин арада математикадай олимпиадада сад лагьай чка кьунвай, АПИ-дин студент тIигьирви Нежеф Балажаеваз са пишкешни ганай. Жегьилри са шумуд алимдиз эвер ганавайтIани рикIна тек кьвед — Шихзагьир Гьажиев, Абдулмежид Рзаев атанвай. Абуру чпин рахунра студентриз хъсан меслятарни ганай. Чпиз кьведазни аллагьди регьметрай!

И мярекатда за сифте яз жуван шиирарни лагьанай:

И рик1икай хабар аван?

Алахьрай къе «Лезгинкад» ван.

Сагъ хьурай чи «Кардинин» чан

Яшамишрай чан жуванбур

Чкадал ацукь хъвурдалай къулухъ зун чехи шаир хьиз авай. Гуьгъуьнай студенрини зи тIвацин вилик шаир гилигнавай.

«Кардинин» ширин манийрин ванцел къецел кIватI ханвай инсанрин кьадар къвердавай пара жезвай. Са яшар авай бадедин «чан бала зун къенез ахъая, кIвачел акъвазда, гьикьван кIани ятIа пулни гуда» лугьур гафар къени зи япара ама. Чна варар ахъайнай…

Гуьгъуьнай и кар хъсан са адетдиз элкъвенай. Са шумуд сеферда чара — чара ВУЗ-ра кьиле фенай ихьтин мярекатар. Амма сад лагьай мярекат къенин югъ хиз зи рикIел алама.

Эйваз Гуьлалиев
Шаир

Добавить комментарий

Ваш адрес email не будет опубликован. Обязательные поля помечены *