2012-йисуз лезги шииратда экв тур улубрикай садни Кьилегь Къудратан «Хкягъай эсерар» хьана.
Кьилегь Къудратан улубдикай гьа икI лугьун дуьз жеда. Вучиз лагьайтIа, 81 йис уьмуьр гьалай, 66 йисуз шиирар туькIуьрай са шаирдин сад лагьай улуб анжах адан 90-йисан юбилейдиз чап хьанва. Им, гьакъикъатдани, инсандин рикI юзурдай са кар я.
Себеб вуч тир? И суалди гзафбурун рикIер регъвена жеда, гьабурукай яз винидихъ квай цIарара вил экъуьрайбурунни. Кьилегь Къудрат тIили шиирар туькIуьрзавай са шаир тушир, ам шиирдив туькIвенвай, рифмадив диганвай шаир тир. Алатай асирдин юкьварилай инихъ адан чIаларин аваздал гъил хкажна кьуьлер тавур, адан гафариз кхьенвай манидин цIарар пIузаррикай кушкуш тавур кас бажагьат жагъида. Ам мецера эзбер тиртIани, адетдин лежбер тир. Я кьама ял туна вич вине кьун, яни зун шаир я, заз икрама, лугьун адан къилихда авачир. ГьакI тирвиляй ам гьа са шиирар кьуд-вад жуьре чапзавай гзаф «шаиррилай» вине авай ШАИР я! Ахьтин са шаир хьи, шиирри гзаф инсанрин рикIин къене чка кьунва!
Улуб «ЧиРагъ» журналдин редакцияди чапнавай кьудлагьайди я. ТуькIуьрна сифте гаф кхьейди Вакъиф Муьшкуьрви, редактор филологиядин илимрин кандидат Гуьлбес Асланханова я. Улубда гьакIни зари Гуьлалийрин Эйвазан Кьилегь Къудратакай рикIел хкунарни гьатнава.