Дагъустан республикадин президентдин  29 август 2013 йисан 242 №дин указдалди адаз  Дагъустан республикадин халкьдин кхьираг тIвар ганва.
Шаир, гьикаятчи ва драматург Исмаилов Абдуселим Абумислимович 1947-йисуз С. Сулейманан райондин КIеле хуьре дидедиз хьана. Ада Уружбадин юкьван школа ва Дагъустандин университет куьтягьна, мектебда, лезги радиодин ва «Коммунист» газетдин редакцийра кIвалахна. Алай вахтунда ам ДР-дин писателрин союздин литературадин журналрин кьилин редактордин заместитель я.
А.Исмаилов литературадиз аялар патал теснифзавай шаир яз атана, гуьгъуьнлай ам чIехибур патал шиирар, поэмаяр, повестар ва драмадин эсерар кхьинал элячIна. Зари «Кагьрабаяр», «Чилин бахт», «Яргъируш», «Чигедин стIалар», «Саламан пакама», «Вацран мичIер» ва маса улубрин  кирам я.
Лезги театрди драматургдин «Чигали»(1990), «КIвал хъитIкьина» (1994),  «Дустагъда мехъер» (1994) ва «Къарачияр» (2001) ва маса песаярни сегьнедал эцигнава.
Зари РФ-дин писателрин союздин член, «ДР-дин лайих кIвалахдар» я. Ада вичин хзанни галаз Ма­гьачкъалада уьмуьрзава.