"АЛАМ" - Лезги културадин журнал

15№2 (16) ДЕКАБР 2016
Новый номер журнала "АЛАМ" уже в продаже!
Ознакомиться с темами номера можно тут.

Гуьлжагьан Мисриханова

Мисриханова Гуьлжагьан Шамсудинан рушМисриханова Гуьлжагьан Шамсудинан руш 1958 йисуз СтIал Сулейман райондин КIахцугърин хуьре дидедиз хьана. Кьасумхуьруьн юкьван школа куьтягьайла ада Дербентда бухгалтервилин, Туьркменияда педагогвилин мектеб акьалтIарна школада муаллимвиле кIвалахна.
Кьисметди и инсан хизанни галаз Голландиядиз акъудна. Гуьлжагьаназ пуд хва ва хтулар ава. Хайи макандивай яргъариз акъатай дишегьлиди жегьил чIавалай хайи чIалал шиирар кхьизва. Адан кьве поэзияди улуб («Кьисмет», «Пуд стIал» ) акъатнава.

 

 

  

Хтана зун мад ватандиз

Мад хтанва зун ватандиз
Секинариз тIал.
Йиса секин тахьай рикIи
Къачузмач мад къал.
Мад хтанва зун ватандиз
Къужахда кьаз ам.
Галат тийиз тик гуьнейрай
Къачузва за кам.
Къалгъанрини чухваз закIам
КIвачик кватIан къван,
Хтанва зун гьа ватандиз
Им я зи ватан!


Дагъларикай фикирар

Бегьерар квай михьи тум чилериз вегьез
Чи дагъларин кукIушра къекъвезва гатфар
Хуш авазрин ванер тваз хайи ватанда
Цуьк акъудай тарарал ацукьна къушар.

Зун физвай шегьре рекьер дагълариз элкъвез,
Акъвазнава вилик зи вегьез твазвач кам!
Вил хьанва вахъ ватандин суракьиз-къекъвез
Эй кьуру тан! Лагь себеб сефил тунвай ам.

Лугьузва за зун я халис лезги чилин руш
Са арайра элкъвезва кьил ягъазвач жувахъ
Вилерикай карагзавач дагълар рикIиз хуш
Къекъведайла Амстердамда жен тийиз чIалахъ!

Им жедай кар яни кьван гьинава зи чил
Вири хьтин зунни бес тушни са инсан.
Рагъ аваз къвазвай марфади гатазва зин кьил
Къекъвезва зун мад рахаз хиялрив жуван!


Дидедин хъвер

Милаим хъвер дидедин
Чинавай жегьил
Акурла зун шад жеда
Хкаж жез гуьгуьл.

Куьчедай зун хтайла
КьацIана шалвар.
Зал, зи диде хъуьрейла
Шад жеда гьалар.

Хатадай мад чайдин къаб
Аватна гъиляй.
ХайитIани, чан диде
Ягъмир зун хъиляй.

Зун гъвечIи я, кьаз вуна
Эцига метIел.
АвуртIани хатаяр
Гъил элкъуьр кьилел.

Алукьна, зи тIар хьанвай
МетIел алай хер.
Сагъ хъийидай дарман я
Зи дидедин хъвер.

Зазни хъуьрез чирайди
Диде я эвел
Хъвер хьурай йифиз-юкъуз
Дидедин сивел.

Инсан я вун заз кIени
Кьазва за хиве.
Вун зи дамах, шадвал я
Хъуьрезвай диде.


Булах

Михьи я чи булахдин гьамгадин ятар,
Ша булахин серинрик стхаяр, вахар.
Гуьгьуьлар ачух хьурай, муьгьуьббат рикIе,
Квез къуватар артух хьуй, илгьамдин рекье.

Абукевсер, магьи я и булахдин дад.
Геж тавуна ша инал, кам къачуна фад.
Лагь, булахдал виридаз хуш жедай гафар.
Сагърай “ЛЕЗГИ ЧИЛ” лугьуз рахурай цавар.

Хкуд лезет булахдал, ажеб хуш вахт я
Хайи чилел кIвач вегьен, им чIехи бахт я.
Мад гьалтда чун булахдал, йис кума вилик
ЦIийи умудар кутада, къастари рикIик.

Лезги чилел ала, чи дидеяр мягькем.
Руьгьдикай булах хьанвай, яд авай зем-зем.
Ватандин къадир авай, рушар я лезги
Сагъ хьурай зин чIехи халкь,
САГЪ ХЬУРАЙ ВИРИ!


Захъ вири ава

Шукур хьуй ваз, я сад Aллагь:
Ганвай, заз кьве гъил,
Кьиле мефтIер, чинани зи
Аквадай кьве вил.

Ван атурай лугьуз,хъсан
Ганва заз япар.
Мезни ганва, рахух лугьуз
Хуш жедай гафар.

Ганава заз гуьрчегвални
Дишегьлидиз хас.
Заз инсанар гзаф канда
Авач дакан кас.

ТIалабзава датIана
За Аллагьдивай.
Вуна гайи гьич са затIни
Гахчумир, завай.

Добавить комментарий

Защитный код
Обновить

Главная Статьи Гуьлжагьан Мисриханова