«Алам» лезги културадин журналдин цIийи йисан сифте тилит гьа икI печатдай акъатнава.
Тилит «Чи къаст ам я хьи…» кьил ганвай редакциядин макъаладалди ахъа жезва. «Редакциядин мурад журнал тек са тежриба авай кхьирагрин ваъ, гьамни икьван гагьда чпин кхьинар винел акъуддай имкан авачирбурузни трибуна авун я.»-кхьизва авторди.
«Зи уьмуьрдин шикилар»- ихьтин кьил алаз чи чIехи шаир Забит Ризванован журналда чапнавай рикIел хкунрин сифте чукIар устаддин аял чIавариз, Манкъулидхуьруьн тарихдиз талукьбур я.
Дагъустандин халкдин артист, шаир-композитор Асеф Мегьманан чи ватанэгьли, машгьур композитор Омар Аюбов рикIел хкана кхьенвай «Паласайрин авазар» тIвар алай очеркни и тилитдик акатнава.
Тарихчи Дилбер Агъаевадин кIелзавайбуруз тIвар-ван авай камалэгьли Салегь Эфендидин уьмуьр ва яратмишунрикай маракьлу малуматар гузвай макъалади, профессор Ярали Яралиеван «Мадни Албаниядин тарихдикай» очеркди, Камран Къурбаналийрин «КIвал къени хьурай, кIелдайди» къейдерини и тилитда чка кьунва.
«Аламдин» уламар”. Шаир, чIалан устад Арбен Къардаша вичин макъаладал ихьтин кьил эцигнава. Ада журналдин виликан тилитра акъатнавай материалар пешекарвилелди тупIалай авуна вичин веревирдер, меслятар къелемдиз къачунва.
«Данкодин рикI хьиз»-филологиядин илимрин кандидат Азиз Мирзабегован и очерк шаир, прозаик, публицист Седакъет Керимовадин 60 йисан юбилейдиз талукь яз кхьенвайди я. «Са инсандилай икьван кIвалахар алакьун, адахъ абур кьилиз акъуддай къуват хьун им аламатдин кар я», — кхьизва алимди.
«Лезгийрин мехъеррин адетра магия» — кьил ганвай макъалада тарихдин илимрин кандидат, этнолог Фейруз Беделова дегь девиррилай атанвай адетри алай девирдин мехъеррин межлисриз милли колорит, тафаватлувал, алванвал гъизвайди къалурзава.
Гьам авторрин, гьакIни макъалайрин кьадардалди виликан тилитрилай тафаватлу тир и нумрада Дарвин Велибегован «Египетдин виш гъуц ва лезги чIал», Азрадиода лезги чIалан гунугар тешкилунин 20 йисаз талукьарнавай «Рахазва Баку», Вакъиф Муьшкуьрвидин «Кхьинра авай лишанар ва абурун тIварар” макъалаяр чап хьанва.
«Гъезелрал ашукь дишегьли» кьил ганвай макъалада филолог Гуьзеля Гьасановади чи тIвар-ван авай шаир Бажиханум Исаевадин поэзиядин чешнейрин кьетIенвилер ачухарзава, шаирдилай гъезелдин жанрдин мумкинвилерикай устадвилелди менфят къачуз алакьнавайди къейдзава.
Филологиядин илимрин доктор Фейзудинин Нагъиеван «Лезгинка» макьамдин тарихдикай» тIвар алай макъала саки эхиримжи чIавара адал чаравилин гиманар гъизвайбуруз кутугай жаваб гьисабиз жеда.
Абир Тагьирован «Алупан чIаварин килисаяр», Эйваз Гуьлалиеван «Варар ахъая жегьилриз», Римма Гьажимурадовадин «И цIарариз гугъ аватIа», Билал Адилован «Руьхъведикай хкажда кьил» тIварар алай макъалаярни маракьлу, кIелзавайбуруз бегьем информация гузвайбур я.
Журналдин и маракьлу тилит квевай «КцIар» газетдин редакциядай гъиликна кIелиз жеда.