Лезгийрин фолклорда лирлийри ч1ехи чка кьазва. Чи бадейри лирлияр лугьуз чпин рик1ер аладардай, хтулар, штулар, птулар мили авазралди ксурдай. Чав дегь ч1аварилай агакьнавай риваятрикай сада итимринни гъуцарин арада авай рекьиз чна ли лугьудай. Христианрин иконайра гъуцаринни итимрин арада авай къушраз чна лиф лугьуда. Къенин юкъуз чна лирани лезгийрив вахгана. Чи бадейри са ч1авуз лирлияр лирадал ягъиз лагьанай жеди.
Алай йисан 26- апрелдиз Рашид Бейбутован тIварунихъ галай Гьукуматдин Манийрин Театрда «Алам» лезги медениятдин журналди туькIуьрнавай «Лира» тIвар алай музыкадин конкурсдин гъалибрин концерт кьиле фена. Мярекат чи играми профессор, илимрин доктор, са шумуд уьлкведин илимрин академиядин академик Камал Абдуллаева ахъайна. И кар лезги музыкадин тарихда са цIийи чар хьана. Сад лагьай «Лира» премия къачурбур йисан виридалайни хъсан лезги эстрададин манияр лугьудайди номинацияда Руслан Пирвердиев, йисан виридалайни хъсан лезги халкьдин манияр лугь-удайди номинацияда Магьире Шириновава, йисан виридалайни хъсан лезги реп лугьудай номинацияда Элтудо хьана.
Гъалибри чпин рикIин гафар лагьана, номинация туькIуьрайдай «Алам» журналдиз, гъалиб авурдай лезги халкьдин векилриз пара кьван сагърай лагьана.
Чи халкьдин дамахдиз лайих тир Шербет Рзакъулиева, манидарар Лариса Межидовади, Эгьмед Къурбанова, «Лезгинка», «Дикий Кавказ» куьлерунрин группайрини концертда иштиракна, чпин агалкьунарив залда авайбурун рикIера экв, цIай ктуна.
Ихьтин иер йиф поэзия галачиз хиялдиз гъиз жедани бес? «Марвардин” тIварцелай гаф зари Эйваз Гуьлалиеваз гана. Ада хуралай, вичиз хас пафосдив лагьай шиирри межлисдиз мадни гурвал гана.
Мярекат тухузвай Руслан Шейдаевани Бести Нифтиевади чеб и карда дуьшуьшдин туширди субутна.
«Алам» журналдин редактор Къурбаналийрин Камрана къейдна хьи, «Лира» конкурс идалай кьулухъ номинацийрин къадарни пара яз гьар йисуз жервал я. Къведай йисуз ирид номинацияда лезгийрин арада виридалайни хъсанбур хкягъ ийирвал я. Конкурсда са лезги манияр лугьузвайбуруз ваъ, гьакIни лезги литературада чпин гаф лагьайбуруз чка гурвал я. Гьамани лугьун герек я хьи, «Алам» журналди Бакуда «Марвар» тIвар алай лезги литературадин кIватIал туькуьрнава. И кIватIал вацра садра жезва ва ана лезги кхьирагар литературадин экуьнал кIватI жезва.
Анар Уьнуьгъви,
Баку шегьер
«Кцlар» газет