Вар ахъайин жегьилриз
Веледов Энжем Азеран хва 1986-лагьай йисан июлдин 24-аз Азербайжан Ресбупликадин Кӏцар райондин Манкъулидин хуьре дидедиз хьана. Юкьван мектеб акьалт1арна, Азербайжан Универститетдин «Фармоцевтика» факултедиз кьабул хьана. Алай ч1авуз «Зейтун» аптекда к1валахзава. Лезги ва азербайжан чӏалал шиирар кхьизвай жегьилдин эсерар «Самур» газетда чап хьанва. Гьак1ни лезги ва Азербайжандин зарийрин шиирар иер ванцив к1елиз сайтара эцигзавава. Чна жегьил шаирдиз агалкьунар, вичин чирвилер пара авун мурадзава.
Т1игьиржал
(Зи бубайрин ватан тир Т1игьиржализ)
Вун кьван зурба тарих авай хуьр алатIа чилерал!?
Ашукь я зун, кьил цаварихъ галукьзавай пелерал.
Эмиралид(ин) хци къелем, гапурни я, ТIигьиржал
ЧIехи алим Яралидин — сабурни я, ТIигьиржал!
Кьакьан дагълар рам авунвай ви рухваяр лекьер я,
Иер рушар, хайи чилин атир галай цуьквер я.
Ваз кутугай экуь йикъар — пак лишан я, ТIигьиржал,
Ви накьварал шад я рикIер, гуьлуьшан я, ТIигьиржал.
Вун Энжеман хайи ватан — чи бубайрин аманат,
Рикӏин къене хуьда ви тӏвар, верц1ивал тир аламат.
Ви тарифар, ви суракьар, виринрава, Тӏигьиржал
Сур чIаварин тарихар ви деринрава, Тӏигьиржал!
*****
Чӏехи Забит, атанва зун сурал ви
Ваз кхьенвай, шиирикай пай къуна
Агъзур жузун алтӏуш хьанва хурал зи
Кузва зи рикӏ ялав къуна, цӏай къуна
Чӏехи устад атанва мад сурал ви
Хайи чилин цуькверикай пай къуна
Ви шиирра мад къекъвезва хиял зи
Ви чӏехи т1вар гъуцариз за тай къуна
Абдуллагьан ракъини экв ганай ваз
Экуь рикӏе хайи халкьдин пар туна.
Ви экуь рехъ чӏехи чешне хьанай чаз
Эбеди яз чаз лезгидин тӏвар туна.
****
(Иер инсан, хъсан кхьираг, хайи ч1алан аскер хьайи
Шихжамал Шихметован руьгьдиз)
Милли руьгь квай, сали кас тир эквалай,
Чи несилри бегьер к1ват1да ник1елай,
Лезги халкьди алуддач вун рик1елай,
Ви гьар са гаф аманат я, Шихжамал.
А дуьнедай ават1а жал са гурар?
Я тушт1а лиф, хкидай чаз хабарар?
Ич1и хьанва зи руьгьдавай ивирар,
Рик1е зи дерт шумуд къат я, Шихжамал.
Саки рагъ тир вун аваран чилериз,
Са дарман тир начагъ хьанвай рик1ериз.
Амач къе вун, хабар хьурай эллериз,
Фана дуьня хажалат я, Шихжамал.