Зи хайи ч1ал, лезги ч1ал яз
Дамахда за, дат1ана.
Лезгивал за, рик1е аваз
Хуьз алахъда дат1ана.

Чаз сайтарай чидай Алпандин ц1ай рик1е авай Лекь, Ибрагьимрин Рамил Садикъан хва я. И жегьил Кц1ар райондин Ст1уррин хуьряй я. 1988 йисан сентябрдин 6-аз Пакуда дидедиз хьана. Юкьван мектеб хайи шегьерда к1елна, Азербайжандин Техникадин Университетдин Электротехника-Энергетика факултет акьалт1арнава. Алай ч1авуз Азерсу АСЖ-дин Низами райондин хиле електрикдин к1валахриз килигзава.

Рамила шиирар кхьизва, хайи ч1алал. Иер, верц1и, фагьумиз, фикириз тадай жуьреда. Зун ч1алахъ я, адаз вичин рехъ жагъида. Вучиз лагьайт1а адаз руьгь ава, шаирдин руьгь. Хайи ч1алал, чилел ашукь я, рик1 ала, вич-вичел ч1алахъ я.

Сагърай Рамил, ваз дат1ана агалкьунар мурадзава.

Я лезги хва

(Хкаж хъия, на парудал аватай са къван.
Эйваз Гуьлалийрин)

Тӏвар вине яхъ вуна жуван, лезги хва
Чӏал меце яхъ вуна жуван, лезги хва
Чира вуна чарадазни лезгидин тӏвар
Дамах ийиз кьил вине яхъ, лезги хва!

Лезгивилиз усал крар мийир вуна
Лезгивал чи хуьх датӏана рикӏе вуна
Бубайри чаз тур адетар хуьх кьатӏана
Са ч1авузни, кьил агъузмир лезги хва!

Хьайитӏани вун яргъара Ватандилай
Жузуз вуна дидедин гьал, лезги хва!
Хкаж хъия парудал гьар аватай къван
Чӏкиз тамир бубадин кӏвал, лезги хва!!!

АЛБАНАР

Лезги, Будух, Къырыцӏ, Рутул,
Къетши, Цӏахур, Удин, Агъул,
Гъабгъан, Арчи чун я са къул
Чун са Халкь я, сад албанар!

Я албанар, сур албанар!
Яхъ куьне куь, вине чӏалар!
Рикӏелайни алуд мийир
Бубайрилай амай пунар.

Лекӏер я чун, албанар я
Иви абурун, иви я чи.
Викӏегьвални чанда авай
Садазни чун муьтуьгъ тахьай.

Дидедин чӏал, бубадин кӏвал
Сад тир чи а чӏавариз.
Тик хьун патал амай са цал
Вик1егь къваза, вун хва хьиз.