И йикъара чи эдебиятда, поэзияда рик1из хуш кар хьана. Чи сейли шаирар, лезги шиирда чпин чка, мас, рехъ хат1 авай, гьалал зегьметдив к1елзавайбурун ихтибар гъиликтарнавай, ч1ехи сеняткарвилив чи гафунин хазинадик пай кутунвай  Сажидин  Саидгьасановазни Фейзудин Нагъиеваз Дагъустандин Халкьдин Шаир т1варар гана. Дуьнядин ихьтин акахьай береда и хабарди поэзия канибурун рик1ера экв, чим туна.
И кар чи литературадиз, поэзиядиз, ч1алаз ганвай зурба мас я.

Чна Квез мад гъилера мубаракзава, чи хуш мурадар агакьарзава. Чун ч1алахъ я хьи, куьне ватан, ч1ал кан хьуниз, халкьдин руьгьдин т1алабунриз хидметзавай ц1ийи эсеррив к1елдайбуруз дат1ана хвеши хъийида. Чун къакъатнават1ани, чи поэзия, култура сад тирди алемдиз чирда.
Ц1ийи т1вар кутуграй, мубаракрай чи ч1ехи зарияр!

Кани тир Сажидин малим! Квез- чи рехи, экуь касдиз, элдин рик1 алай, т1ван-ван авай заридиз чна Дагъустандин Халкьдин Шаир тварц1из лайих акун мубаракзава, чандин сагъвал мурадзава. Куьн са шаир хьиз, драматург хьиз лезгийриз, гьак1ни пара халкьариз чида. Къадалай виниз улубрин кирам тир, Урусатдин Кхьирагрин, Журналистрин к1ват1алра авай, Дагъустандин «Честь», «Гордость», «Октябр 100» орденрин кавалер, Дагъустан Республикадин Лайих тир културадин к1валахдар, са кьадар медалриз, гьакуматдин дамахдин чарариз лайих акунвай чи сейли Сажидин Саидгьасановаз Дагъустандин Халкьдин Шаир т1вар гун чи рик1яй хьана.

Играми Фейзудин малим! Чи халкьдин ч1ехи алим, шаир тир Квез- Фейзудин Нагъиеваз Дагъустандин Халкьдин Шаир т1вар гун чи кьилин ч1ехивал, хвешивал я. Къадалай виниз улубрин, ц1удалай пара монографиядин кирам хьиз, са шумуд ктабдин редакторни тир, Дагъустан Республикадин Културадин лайих к1валахдар, «Къизилдин лекь», «Шарвили» премиярийрин лауреат, Урусатдин Кхьирагрин к1ват1алдин, Културадин министерствадин дамахдин чарариз, медалриз лайих акунвай филологиядин илимрин доктор тир лезги шаир и дамахдин т1варц1из лайих акун чи халкь патал ч1ехи агалкьун, дамах я.

«Алам», «Марвар»