Вахт тахьанмаз къакъатай Зерифа Кьасумова-дин экуь къаматдиз бахшзава

Зун аруш я шииратдин шаршавда,
Шулу я зун, шаклубур я шагьварар.
К1вач ат1умна жуван Катрамаканда,
Вилив хуьзва дегиш жезвай гьаваяр.

Кьве гъил цавуз хкажна за ялвардин,
Кужумзава къакъатунин илгьамар.
Лап хъуьт1уьзни жив тежедай арандай
Гьик1 кьабулин и вахт тучир игьсанар?

Агалнава аждагьанди рекьер заз
Зерифадин кам амачир Къубадиз.
Зун шаршавда, гъилени зи тур авач.
Чи бубайри эцигнавай муькъвер чаз
Элкъуьрнава къадагъайриз, тубайриз,
Къубадани ясдин гарун зур ава.

***

ЧIар канамаз къвалав жедай Зерифа,
(Уртахбур тир чи сирерни мурадар).
Ашукьна зун кьилди чIугваз гьайифар,
Кьуьзуь кьилихъ гьинай гъида къуватар?

Зи руьгьдин вах, ни авуна зайифар?
Къенибур тир зари вахан ниятар.
Метлеб амач, герек амач тарифар,
Векъибур я чи кьисметрин адетар.

Жуван чилел, жуван вацIал, жуван муьгъ,
Кьвед кьве пата хьуналди низ вуч авай?
Ни фикирдай иблисри рехъ кьадайди?

Иблис къвазна чи муькъвел чаз гузва тIуьгъ,
За чIар кузвач, зал киф атIай гуж ала,
Амач зи дуст, зи гьарайдиз къведайди.

***

«Ву-дегь» хьана серсер я зун,
Яд экъична, квар хана.
Тек гъамарин есир я зун,
Ядигар ви тIвар хьана.

Агакьнач и сефердани
Хайи муькъуьн гъвар хана,
Зи къастунин эмирдикай
Заз агалай вар хьана.

Хъсан чидай заз ви хесет,
Межлисдани жедай вун тек —
Къилих халис заридин.

Вун хъфена, амач муьгьлет,
Амач чара, амач куьмек,
Теквал хьана мад види.

Дагъустандин халкьдин шаир
Ханбиче Хаметова