Рехъ це жегьилриз

Шихмурадова Жале Новрузан руш, Межидова Лейла Элчинан руш. И кьве руша КцIар райондин Чипир хуьруьн юкьван мектебдин Х-классда кIелзава. Сад-садан вах лагьай таватар дидед чIалан тарсар гузвай Фейзулла муалимдин лап рикI алай аялрикай я. Абуру хуралай лугьудай лирлийриз, чпи туькIуьрзавай шиирриз  яб гудамаз вирида кисда. Сифте камар «КцIар» газетда вегьенвай рушарин шиирар чна «Алам»-дин кIелдайбурув агакьарзава.

Жале Шихмурадова

Диде Ватан

Вуч верцIи я, зи лезги халкь,

Хайи чилел экъвезвай.

Вуч шегьре я, лезги шаир,

Дидед чIалал кхьизвай.

 

Хкаж хьана дагъдин синел,

Тамашайла Самурдиз.

Алхишзава за халкь хвейи

Шарвилидин гапурдиз.

 

Мадни хьурай гуьлуьшан вун,

Мадни хьурай авадан.

Аваз хьурай жигъирра гел,

Сулейманан, Саидан.

 

Тарихра гел тунвай элдин,

Вилик ахъа вар гала.

Дагъви я зун, зи миллетдал

Лезги лагьай тIвар ала.

 

 

Лейла МЕЖИДОВА

 

Жедани?

«Лезгинка»дин ван атайла,

Кьуьл тавуна къваз жедани?

Хайи элдин и хуш аваз,

Са къерехдихъ таз жедани?

 

Хвешивиляй акваз-акваз,

Михьи гьиссер хъуьреда заз.

Хайи Ватан аваз-аваз

Гъурбат рикIе тваз жедани?

 

Садлагьана ахъайда цуьк,

Ван атайла акъвазда гьикI?

«Лезгинка»дал ягъазвай рикI,

ТакIандавай хаз жедани?

Добавить комментарий

Ваш адрес email не будет опубликован. Обязательные поля помечены *