Чи литературади вичин зурба кхьирагрикай сад квадарна. ТIвар-ван авай педагог, драматург, хъсан ватандин хва Мирзали Рустамова яргъал чIугур начагъвиликай 87 яшиндаваз дуьне дегишнава.
1929-йисуз Яргунрин хуьре дидедиз хьайи Мирзали Эбилан хва Рустамова хуьруьн юкьван мектеб акьалтIарайдалай кьулухъ Къубадин Муаллимрин Институт ва Азербайжандин Гьукуматдин Педагогикадин Институт акъалтIарна пак муаллимвилин пеше къачунай.
Саки пудкъад йисаз мукьва и кеспидалди дамахай Мирзали Рустамова вичин халкьдиз, адан културадиз къуллугъ авун, пакаман несилриз кьакьан чирвилер гун уьмуьрдин кьаст гьисабна.
Ада 50-йисарилай кьил кутуна вичин дуст, кIвалин юлдаш, гуьгъунай «лайихлу муаллим» тIварун иеси хьайи Азиз Гьажиевахъ галаз санал тек са мектебдин ваъ, хуьруьн, райондин културадин мярекатрик къуьн кутуна.
Мирзали Рустамован шиирар ва гьикаяяр 1960-йисалай журналрин, газетрин чинриз акъатнай ва кIватIалрик акатнай.
Къелем асул гьисабдай комедиядин жанрда кардик кутур драматургдин «Кооператив ашпазхана», «Кефербег», «Рекетирар», «Етим Эмин», «СтIал Сулейман» хьтин песаяр Дагъустан Республикадин СтIал Сулейманан тIварунихъ галай Лезги муздрамтеатрдин сегьнедал эцигна.
Сеняткардин «Кьилиз тефей гастрол», «Гьайиф, алатай йикъар», «Гьемдуллагьан хам хиялар», «Санитар», «Меккедай хтай гьажи», «Гьава ахъа жезва», «Тахсиркар вуж я» песайри къениндалди КцIарин Гьукуматдин Лезги Театрдин репертуарда кьетIен чка кьазва. Адан са шумуд песа КцIар, Къуба, Хачмаз ва Худат шегьерра къалурна.
Мирзали Рустамова литературадин чIехи ирс тунватIани, сегьнедал эцигай эсеррин кьадардиз килигайла чи драматургияда сифте чкадал алатIани, адан зегьметдиз лайихлу къимет ганач, са ктабни басма хьанач. Чавай хьайитIа, хайи културадин, драматургиядин таъсиб чIугвазвай ксарикай сад юкьвал акъатна адан руьгь шадардай и кар кьилиз акъудда.
Аллагьди рагьмет авурай!
