Дамахдин тIвар мубарак я, Арбен стха!

И мукьвара Дагъустандай чаз хъсан са хабар агакьна. Чи иер зари, «АЛАМдин» кирамрикай тир, къени инсан Арбен Къардашаз Дагъустандин Халкьдин шаир тIвар гана.
Арбен Къардаш 1961-йисан 11 февралдиз Докъузпара райондин Миграгърин хуьре шаирдин хзанда дидедиз хьана. 1979-йисуз хайи хуьре мектеб куьтягьай ам Москвадин Литературадин институтдиз гьахьна ва анаг 1984-йисуз куьтягьна. ЦIудалай гзаф ктабар акъуднава: «Сифте цуьквер» (1985), «Ичерин багъ» (1990), «Пешапай» (1993), «Йифен суфатар» (1994), «Арш» (2001), «Юкь» (2010) – лезги чIалалди ва «Шехь, зи цIвелин тар» (1995), «Ватандин гум» (1997), «Багьа мугьман» (2005), «Сегьердинни рагъдандин арада» (2006), «Чара атIай кьуьл» (2011), «Гаф давам жезва» (2013) – урус чIалалди.
Арбен Къардаша, урус чIалаз элкъуьрна, Етим Эминан шииррин «Гуьгьуьл» (1990) ва СтIал Сулейманан шииррин «Малум тушир чIалар» (1994) ктабарни акъудна.
Арбен Къардашан хейлин шииррар, гьикаяяр ва макъалаяр Москвадин издателствойра акъатай уртах кIватIалра ва антологийра гьатнава, Урусатда акъатзавай «Литературадин газет», «Литературадин Россия» газетра, «Къавкъаздин гими», «Дон», «Къавкъаздин сес», «Сиягьатчи» журналра чапнава.
Шаирди тамашиятдани кIвалахзава. Адан «Фана багъдин гьуьруьяр» драма ва «Хукац-ханум» мах Лезги театрдин сегьнедал эцигнава.
Арбен Къардашаз 1991-йисуз Дагъустан демократ жегьилрин Союздин «Олим», 1999-йисуз Дагъустандин гьукуматдин, 2006-йисуз Дагъустандин журналистрин Союздин «Къизил лекь», 2013-йисуз Гьажибег Гьажибегован тIварунихъ галай, «Лезги газетди» тайинарнавай премияр, «Дагъустандин искусствойрин лайих сеняткар» тIвар, Урусатдин ва Москвадин писателрин Союзрин уртах къарардалди М. Ю. Лермонтован медаль ганва.
«Алам» журналди редакцияди, «Марвар» литературадин межлисди чаз ихьтин зурба шаир, хъсан дуст хьунал дамахзава, гьакIни Арбен малимдин и гьуьрметдин чIехи тIвар барка ийизва. Чандин сагъвал, руьгьдин гуж, туькIуьрун­рин рекье цIийи агалкьунар мурадзава!

“АЛАМ”

Добавить комментарий

Ваш адрес email не будет опубликован. Обязательные поля помечены *