«МАРВАРдин» кимел

«МАРВАРдин» кимелЗаз са йис идлай вилик интернетдин сайтара «Алам» журналдин чинал Забит Ризванован шикил алаз акъатнавай тIилитI акунай. Жуваз хуш хьана кIелайдалай къулухъ кIаникай за:- Баракалла зи чIехи буба рикIел гъанвай ксариз, кхьенай. Лап рикIивай тир и кар, фаданлай Забит Ризвановакай къве цIар кхьидай кас авачир. Гьа и гафар акурла Эйваз муаллимди «вун Забит Риз­вановаз вуж жезва?», лагьана жузуна. Зани зун Забит Ризванован стха Арзуманан хтул я лагьа­най. Заз жувазни шиирар кхьизвайди Эйваз муал­лимдиз лагьана. Адани заз мадни пара агалкьунар тIалабнай. Са тIимил вахт алатайдалай къулухъ Эйваз муаллимди «Марвар» межлисдиз заз эвер гана. Заз пара хуш хьана. Анжах жува жуваз фикирзавай яраб и «Марвар» вуч ятIа? Гьа эвер ганвай вахтунда зун межлисдиз фена. Эйваз муаллимдини Жалал муаллимди чинрал хъвер алаз кьабулна. Гьа межлисда зун Абир Тагьиров, Билал Адилов, Бести Нифтиева, Руслан Шейдаев хьтин лезги културадални поэзиядал пара рикI алай ксарихъ галаз таниш хьана, зи шиирар «Алам» журналда чап хьана. И межлисдилай къулухъ за цIийи «Марвардин» межлис хьун лап рикIивай виливди хвена.
Зун мадни жуван рикIе авай мураддив агакьна. 2016-йисан 1 октябрдиз гатун ял ягъунрилай ахпа, «Марвардин» 36 лагьай межлис Дагъустандин Азербайджанда авай центрада агатна. Межлис гатуз рагьметдиз фейи чи иер шаир Медет Арзуманован хатурдай са герен кIвачел къарагъинивди авална. Руслан Шейдаева Медет Арзуманован шиирар кIелна, рикIел хкана. За лугьун, пара иер, рикIин тIал кьалурдай шиир тир. Шумудра яб акалайтIани вилерал нагъв кьвезвай. Бести Нифтиевадини гьа шиирдин урус чIалал элкьуьрнавай вариант кIелайдалай кьулухъ зари Гюнеш Мовланова марварвияр межлисин мугьман, юстицииядин полковник Панагь Панагьовахъ галаз танишарна, ва вичин лап цIийи шиирар кIелна. Абир Тагировани и мукьвара Медет Арзуманован цIийи ктаб экуьниз акьатдайди лагьана. Меджлисда виридалай пара шиир кIелайди Шагьмардан Агъакишиев тир, и манидални рикI алай касди чаз маниярни лагьана, Азербайжан ва лезги чIаларал шиирарни. Ада гуьзел ярдикай, Ватандикай, дидедин чIалакай шиирар кIелна. Вичин рушахъ галаз рехи зари Бажиханум Исаевани атанвай. За адан шиирар авай ктабар кIелнавайтIайни вич акваз сифте тир. Идлай къулухъ Эйваз муаллимди чи чIехи чIугвар Дарвин Велибеговазни гаф гана. Дарвин Велибекова вичин мукьвара Дагъустанда кьиле фенвай выставкадикай гафна. Адан гафариз Камран Къурбаналийринани къуват гана, выставка пара хъсан алатна, Дагъустандин вири элита атанвай, виридазни пара хуш хьайиди лагьана. Ахпа Адил Къайибханова, Имран Кичибекова, Бести ханума, Эйваз Гуьлалийрина чпин, Руслан Шейдаева Бажиханум Исаевадин шиирар кIелна. Межлисдин мугьманрикай садни «Лезгияр» группадин чIехид Анар Уьнугъви тир. Ада Рио-да хьана алатнавай олимпиадада чка кьунвай лезгийрикай гафна, вичин шиир кIелна. Садлагьай сеферда атанвай мугьман Панагь Панагьова межлисдикай вичин фикирарни лагьана. Арада Эйваз малимди зазни зи цIийи шиирар кIелдай мумкинвал гана. Авайвал лагьайтIа ахьтин чIехи зарийрин арада заз жуван кьве цIар кIелиз пара регъуь тир. Анжах и межлисда шиирар кIелунал са тIимилни гьайиф чIугвазвачир. Вучиз ла­гьайтIа атанвай ксарин гьар сада заз лугьузвай «туькIуьр хъия» гаф, лугьузвай цIар, за пака са цIийи шиир кхьидайла жуван рикIел хкирвал я, ва гьахьтин татугайвилер ахъай тийиз алахъда. Эхирда межлис кьиле тухузвай чкадин кIвалахдар Людмила Къазиевадиз гаф гана. Ада кьенин юкъуз чи арада ава лугьуз вичиз пара хуш тирди лагьана. Виридлайни пара зи рикIел амукьай кар и мукьвара Забит Ризванован 90-йис юбилейдиз бахшзавай мярекат туькуьруникай гайи малумат хьана.

Элнара Ризванова,
Азербайжандин Техникадин Университетдин студент

Добавить комментарий

Ваш адрес email не будет опубликован. Обязательные поля помечены *