Алискерова Марям Эвесан руш 1968 йисан 19 январдиз Дагъустанда, Хив районда Хъукьварин хуьре дидедиз хьана.
1985 йисуз мектеб акьалтIарна, Дербентдин пед.училищда кIелун давамна. Алай вахтунда хуьруьн мектебда тарсар гузва Маряма хайи чIалал шиирарни кхьизва. Адан шиирар «ЛЕЗГИ ГАЗЕТдиз», «Куьредин ярар» журналдиз акъатнава, алай йисуз «Вун хьаначиртIа» тIвар алай сифте улуб басма хьана. «Аламди» и иер таватдиз агалкьунар мурадзава.
Ша!
Лагь вуна заз, ви сиреркай,
Рикlе жуван чуьнуьхнавай.
Накъвар хьана фей селлеркай,
Ашкъи патал дарихнавай.
Лагь вуна заз, къван яни рикl,
Кьатlузвачир зи канивал.
Дердер вучиз эхин за икl,
Гьикьван жеда ви къайивал?
Лагь вуна заз, тlимил амай,
Завай яргъаз къакъатиз вун!
Ашкъи рикlе, вун ахварай,
Акваз жезва, аватиз зун!
Лагь вуна заз, залан ян ваз?
Ша, мукьва жен, жезвач эхиз!
Са легьзеда яб це, на заз,
Дерт ахъайин рикlяй-рикlиз!
Ша каниди, заз илифа,
Рикlе ашкъи вуна туна!
Вун захъ галаз на вердиша,
Хаму шив хьиз жилав кьуна!
Гуьзетнай за!
Физва йикъар, яд фидай хьиз кlамарай!
Рикl секин яз, ацукьнани кlвале вун?
Вун патал зун акъатзава хамарай,
Куьз гьатзавач лагь жейрандин геле вун?
Атайла йиф, зун пенжерда ацукьда,
Хияларда артух хьана сефилвал.
Зи рикlе вун муьгьуьббат яз амукьда,
Гьайиф-гьайиф, сархуш хьана жегьилвал!
Физва уьмуьр,хабар такьаз рикlикай,
Гуьзетнай за, гьамишанда гуьзетнай.
Къати гар яз физвай вун зи виликай,
«Геж ийимир!»-лагьана ваз минетнай.
Зи азизди, ажеб ви рикl секин я,
Зи умудар ихтибарда вири вал.
Ви рикlел зун мад татунни мумкин я,
Зи накъвар хьиз михьиди хьуй канивал.
Ви канивал заз це…
Ви канивал заз це, зи яр,
Ам зи рикlе за эцигда!
Кьезилара жува а пар,
Рикl цlраз вун заз килигда!
Ви кlанивал зи рикlевай,
Ашкъидин цlай яз куькlурда!
Ялавди ам рикlяй къвезвай,
Пак гьиссериз фад элкъуьрда!
Ви канивал вили цавуз,
Ахъай вуна гьиссер хьурай!
Лацу лифре цава лув гуз,
Луварикай гъилер хьурай!
Ви канивал за са руьгь хьиз,
Агакьарда цавун аршдив!
Заз экв гайи са чирагъ хьиз,
Тухуз тадач вун гарари!
Ви канивал туна рик1е,
Фейи чи шад йикъарин!
Вири бахт ваз багъишда за,
Чилеринни, цаварин!