“Йисан манидар” 2012

Шаз декабрдин эвелра чи журналди лезги манидаррикай виридалай хъсанди  хкягъун паталди жузунар кьиле тухвана. Чи къаст 2012 йисан виридалай хъсан манидар вуж ятIа чирун, чи манияр халкьдин гегьенш къатарин арада чкIурун ва популяр авун хьанай. Жузунар чи журналдин ва «Лезги чIал» сайтарихъ галаз санал “Одноклассники” сайтунин «Лезгияр» группада, гьакIни анкетрин куьмекдалди Баку, Сумгаит ва КцIар шегьерра кьиле тухванай. Тежриба ва вахт тIимил хьуни конкурс чавай фикирда кьунвай жуьреда гегьеншдаказ, мадни гзаф инсанар желбна  кьиле тухуз хьанач. ГьакI ятIани и кар сифте яз чи журналди кьилиз акъудна. Аллагьди рехъ гайитIа къвери йисара чавай конкурсдин гъалибриз дипломрихъ галаз премияярни гуз жеда. Гила чна конкурсдин нетижеяр раижзава.

I диплом. Пирвердиев Руслан Булферан хва 

1974 йисан июлдин 20-аз Хачмаз райондин Ялама хуьре дидедиз хьанва. Генерал М. Абилован тIварунихъ галай Яламадин юкьван мектеб акьалтрай Руслан Бакудин Гьукуматдин Архитектура ва Эцигунрин Университетдик акатна. Гуьгъуьнай Бакудин концеваториядин къвалав вокал мектеб кьилиз акъудай Руслан профессионал вокалистрин цIиргъина гьатна. 1997  -2006-йисара «Сувар» ансамблда кIвалахайдалай кьулухъ ам Дагъустандиз куьч хьана. Эвел Дагъустандин Гьукуматдин Опера ва Балетдин Театрда солист хьиз кIвалахай Руслана алай чIавуз СтIал Суьлейманан тIварунихъ галай Гьукуматдин Лезги Драм Театрда актервалзава.

 

II диплом. Ширинова Магьира Сабиран руш 

КIцар райондин Агъа Лакаррин хуьре дидедиз хьанва. Юкьван мектеб хайи хуьре акьалтрай Магьира кьисметди Бакудиз акъудна. Азербайжандин халкь артист, профессор Алибаба Мамедован регьбервилик квай “Гьумайун” халкьдин алатрин ансамблда солиствалай Магьира профессионал музыкантрин цIиргъина гьатна. 1997-йисалай «Сувар» ансамблда кIвалахай Магьра лезги манидар хьиз чинал акъатна. Махачкъала, Дербенд, Ахцегь, Москва ва Бакудин концерт залра лагьай цIийи манийри Магьира яб аклзавайбурун виле хкажна. Алай чIавуз Магьиради Азербайжандин културадин минестерстводин къвалав “Чинар” туькIуьрунрин кIватIалдик квай “Симаи шемс” ансамблдин солист я.

 

III диплом. Элтудо (Лебибов Элшад Лебибан хва)  

1992-йисан 21 июлдиз Бакуда дидедиз хьанва. Бакудавай 167 нумрадин юкьан мектеб акъалтIарайдалай къулухъ ам БДУ-дин философиядин факултетдик экечIна. Алай чIавуз Элшада III курсуна кIелзава. Ада алатай  йисуз «Элла», «Фристайл», «Фрагент», «40 цIар», «Дуьня са кинофилм  я», «Куьчедин култура» ва маса тIварар алай манияр арадал гъанва. Са тIимил чIаван къене шира (машгьур) хьайи манидар  КцIара, Бакуда ва Москвадани сегьнейрин мугьман хьана. «Куьчедин култура» тIвар алай реп фестивалдин лауреат я.

 

 

Добавить комментарий

Ваш адрес email не будет опубликован. Обязательные поля помечены *