Са йисан вилик, лезгийрин цIийи тарихда еке къимет авай кIвалах хьанва. За кьатIайвал, и кардикай хабар авачирбурни чи арада гьеле гзаф ава, хабар аваз, чпин къимет гуз агакь тавунвай ксарни. Къе зи кхьинар мергьяматгвай фонд “ЛЕКИ”дикай ятIани, и еке къиметдиз лайихбур, гьа фондунин кьулухъ акъвазнавай ксар я. Зи фикирдалди, и ксари гъиле кьунвай кIвалахдив эгечIай югъ – чи халкьдин жувкьатIунра цIийи чин ахъа авун патал шартIар гьазуриз эгечIай югъ я, лагьайтIа жеда. Вучиз? И суалдиз чна агъадихъ жаваб гуз алахъда.
Гафаргандиз килигайла мергьяматгвай гафунин мана – метлеб, авачир ксариз игьсанар, пулар кIватIна куьмек гун я. Яни, кIеве авай касдин дердиникай жемят хабардар авуна, пул кIватIна, адаз куьмек гун я.
Чи уьлкведа мергьямет гвай тIвар алай фондарин кьадар инлай виликни гзаф тир. Амма пара вахтара абур са гьихьтин ятIани акьалтIай дар къайдадин проблемайрал, я тахьайтIа вичин халисан иесидин пул нагъд пулдиз элкъуьрун патал машгъулбур тир. Са бязи фондар чарчел алайбур, яни халисан кIвалах арадал гъиз алакь тийизвайбур тир. Гьавиляй а фондарикай халкьдин еке къатариз, я са пара хабарни авачир, я артухан хийирни.
Шаз, 20I6 — йисан февралдин вацра, Москвада чпин хзанарни галаз кьил хуьзвай, кIвачи чил мягькемдиз кьунвай са шумуд лезги хци, ЛЕКИ тIвар алай мергьямет гвай фонд ахъайна. Заз инал и фондунин са шумуд кьетIенвал къейд ийиз канзава.
Сад лагьайди, “ЛЕКИ”ди вич са гьихьтин ятIани гъвечIи кIеретI инсанар патал ваъ, вири халкьдин къуллугъда акъвазун фикирда аваз кIвалахиз эгечIзавайди малумарна. Фондуни чи халкьдал ацалтзавай проблемаяр гьялун патал, куьмек гудай вад рехъ тайинарна: Тагьсил, Этнокултура, Кесиб ва кIеве авай инсанриз куьмек гун, Спорт, Обществодин кIвалахар.
Кьвед лагьайди, фондунин кIвалахриз къуват гун паталди, и ксари сифтени-сифте чпин пуларин такьатар агудна ва агудзава.
Пуд лагьайди, фондунин учет виридаз аквадайвал интернетда авай сайтуна тухузва. Гьар са касдивай, вичи гайи пул гьа вичи къалурай рекьиз харж авурди регьятдиз чириз жеда.
Къенин юкъуз фондуни кIвалах ийиз са йисалай гзаф вахт алатнава. “ЛЕКИ”дин харжарин асул пай гьелелиг кьиле акъвазнавай ксарин жибиндай ятIани, чавай, чи инсанри фондунин кIвалахдиз йигинвал гузвай крарик ва пулдик кутазвай пай югъ-къандавай артух жезвайди, къейд ийиз жеда.
Ихьтин са кьатIун авайди я — эгер инсанрин арада ихтибардин дережа агъуз ятIа, халкьдин агьвални агъуз жеда, ам маса халкьарин гъиле авай нинидиз элкъведа. Заз аквазвайвал, “ЛЕКИ” фонд – аллагьди, чи арада авай ихтибардин дережа хкажун патал ракъурнавай мумкинвилин шартI я. Чна, чи халкьди и кардикай жезмай кьван хийир хкудна канда.
Чан жуванбур! Ша чна, гьар са лезгиди и кIвалахдик къуьн кутан! Гзаф – тIимил лугьун тавуна, ни вичивай жедай са виш манат (100 рублей) кьванни “ЛЕКИ”дин фондуниз вегьейтIа, ада халкьдиз куьмек патал вичин пайни кутуна лагьай чIал жезва. СтIалрикай кIватI жез еке вацIар жедайвал, чи куьмекарни кIватI хьана еке крариз элкъведайдахъ зи умуд ква!
Алукьнавай йисуз мергьяматгвай фонд ЛЕКИди вичин хивез мадни еке кIвалахар къачузва: аллагьдин куьмекдалди и къалурнавай рекьер мадни гьяркьуь авуна, гьар са ватанэгьлидин къайгъуйрив гъил агакьдайвал ийида. Ша эгечIа, чан жуванбур!
Фонд ЛЕКИдиз куьмек ийидай гьар жуьредин рекьер ава: волонтервилин, шейерин, пулдин. Гуз жедай куьмекдин паталай “ЛЕКИ”дин векилар квевай агъадихъ галай адресрай акваз жеда:
КОНТАКТар: Россия, Республика Дагестан, Сулейман-Стальский район, с. Касумкент, E-mail: info@fondleki.ru, Email: fondleki@yandex.ru, Телефон: +7967-777-73-20
Пулдин куьмек ийиз кандай ксариз:
Банкунин картадин нумра : 4276 6000 2999 62 34 (Карта Дагъустанда авай ЛЕКИдин векил Шайдабегов Фарманан тIварцел ахъайнава)
Банкунин реквизитар:
БФ «ЛЕКИ», Номер счета:
40703810438000004292
Банк получателя:
ПАО СБЕРБАНК, БИК: 044525225
Кор. счет: 30101810400000000225,
ИНН: 0529116662,КПП: 052901001
Мариф Къадимов