Зи Шарвили халкь

"Алам" журналдин Лезги Няметан тIварунихъ галай литературадин конкурс«Алам» журналдин Лезги Няметан тIварунихъ галай литературадин конкурс кьилиз акъатнава. И йисан конкурсдин тема «Шарвили» тир. Кьуд зариди (Дилмира Ашурбековади, Гьилал Аскерова, Сейфудин Шахбазова, Намик Ферзалиева) чпин эсерар чи журналдин электрон почтуниз рекье тунвай. Жюридик квай Ярали Яралиева, Фейзудин Нагъиева, Ризван Ризванова, Видади Севзиханова, Арбен Къардаша, Билал Адилова, Гуьлалийрин Эйваза, Халидин Элдарова, Мегьамед Ибрагьимова эсерриз гайи масриз килигна 17 хал къачур Гьилал Аскерован «Зи Шарвили халкь» твар алай шиир конкурисдин гъалиб хьана, диплом ва премиядиз лайих акуна. Сейфудин Шахбазова кхьей «Хкведа зун» шиирди 15, Намик Ферзалиева кхьей «Шарвилидин ахвар» шиирди 9, Дилмира Ашурбековади кхьей «Сагъ я Шарвили» шиирди 7 хал къачуна.

Чна конкурсдин гъалиб Гьилал Аскеров мубаракзава, адаз мадни чIехи агалкьунар тIалабзава. ЧIехи гъуцар виридаз куьмек хьурай!…

Зи Шарвили халкь

Салам, зи халкь!
Мубаракрай сувар ваз,
К1ват1ал хьунин гьунар ваз!
Атанва вун К1елезхивел
Шарвилидин суракьда.
Ч1алахъ я вун: гъил кьада ваз
Шарвилидин яракьди.
Алахьзава гирвейрилай
Эверзавай ванер ви,
Дири жеда и ванцикай
Чан алачир къванерни:
-Шарвили! Шарвили ! Шарвили!
Зурзурна и ванци рагарни,
Авагъна цавара ракъарни,
Гьай гана такабур синери
Эверриз эллерин сиверин…
…Амма ам киснава,
-Шарвили.
Кьегьалди гьарайдиз гьай ганач,
Ч1ал адан халкьарив раханач…
Гудач гьай.
Рахадач Шарвили.
Ч1алан ви ягъадач Шарвили.
Хьанач чир и кар ваз къедалди.
Ксус вун, вилив хуьх къведалди
Бахтар ваз къизилдин синидал
Буйругъдив гъуцарин цаварай.
Ч1алахъ я вун гьа ик1 жедайди?..
Ксус вун.
Ксус.
Ахварай гуда ваз
Бахтунин верц1и к1ус!
Ксус!
Белки ваз регьят жен лагьайт1а:
«Аллагьди рагьметрай!»
Къвемир хъел туьгьметрай…
Тушни фад ц1ар ч1угун
Т1варцелай жуван?!
Тушни вахт юзурдай
Кагьулвилин къван?!
Хабар яхъ жувавай:
-Вуж я Шарвили?
-Такьат чи, къуват чи, гуж я Шарвили!
Шарвили -ам,
Шарвили -зун,
Шарвили-чун я!
Шарвилидал вил жемир,
Шарвили-вун я!

 

Добавить комментарий

Ваш адрес email не будет опубликован. Обязательные поля помечены *