Бузовнада уьмуьрзавай асулдай С. СтIалскидин тIварунихъ галай райондин Эминан хуьряй тир Салегьат баха низ акуртIани, ам лезги жен чир жеда. Уьмуьрдин 56 йис Бакуда кьил хуьнуьз килиг тавуна адалай вичин халкьди махсус тир адетар, алукIунарин кIалубар ва халисан лезги чIалан рахунар хуьз алакьнава. И карда са гафни авачиз тIварциз рагьмет кьвезвай  итим — шаир Мегьемедзагьиран тасирни авачиз жеч. Бузовнадавай лезгийриз Салегьат баха хайи халкьдин баядар, лирлияр, лугьунар ва лезги чIалалди хъсан кIелиз- кхьиз чидай са БАДЕ хьизни гзаф кIани я. Адан сейливилерикай сад  чразвай цкIанарни афаррин тIямлувал ятIа, муькуьди  хразвай гуьлуьтаринни мясеррин(чивекрин) иервал я.

И гьалал зегьметдивди храна арадал гъизвай гуьлуьтрин рангар акьван гуьгьуьлриз чимибур я хьи,  на лугьуди   яргъи рушан (хважамжамдин)  рангариз саки Салегьат бахадин вилерин эквни алава хьанва. Гуьлуьтра авай гиширри ва рангарин суьгьуьрди инсандин рикI шадарзава, руьгьдик лувар кутвазва . Вучиз лагьайтIа, рангид гуьлуьтар чи халкьдин туькIуьрунарин культурадин  тарихдин сурвилин са лишанни я.
 
«Алам» журналди чи ватанегьлийриз кIецIепатан уьлкейриз фидайла тухун ва  атай мугьманриз пешкеш гун паталди  лезги милли сувенирар Салегьат бахадивай къачун мислят аквазва.

Контактдин телефон: 055-838-70-44
abir.tagirov@mail.ru
Абир ТАГЬИРОВ