“Алам” аламатдинди хьана кIанда чаз

Бакудай шад хабар агакьна чав: “Алам” тIвар алаз мад са лезги журналдин сифте нумра чап хьанва. “Самурдин”, “Чи Рагъдин” гъвечIи стха дуьнядал атанва.
Сифте гафуна “…чи кьилин къаст лезги культурадин аваданвал хкажун, ам вири лезгийрин арада чкIурун я…”- кьхьизва адан редактор Руслан Шейдаева.
Журналдин тIварцин мана кIелзавайбуруз икI ахъайзава ада: “Алам къадим чIавара Каспи гьуьлуьн кьере хьанавай сур са шегьердин тIвар я. Гзаф къадим алимри чпин ктабра и шегьердин тIвар кьунва. Гиманар ава хьи, Алам гилан Яламадин мукьвал са чкадал алай ва адан тIвар деформация хьанва.”
Мадни хъсан: журналдивай сифте камунилай, гьа вичин тIварцивдини чи халкьдин квахьнавай эменнияр арадал хкиник пай кутаз алакьнава.
Журналдин сифте тилитдик  “Древняя история лезгин” ,“Дешифровка”, “Уьмуьр женгера фейи шаир”,“Народные календари лезгин”, “UFUQ-S”, “Чан аламаз классикдиз элкъвей шаир”,“Лезгийрин мярекатар ва адетар”, “Хцин далу чилив гузвач дидеди…”,“Камарван” кьилер алаз лезги ва урус чIаларалди макъалаяр акатнава.
Чна- вичин 80 йисан юбилей вилик акъвазнавай “Кцар” газетдин коллективдини куьн рикин сидкьидай барка авуна лугьузва: «Алам» хайи Ватандал, дуствилел кьару, чи чIалал, милли эдебиятдал рикI алай гьар са касдин кIвализ кIани мугьман хьиз илифрай!
Квехъ чIехи, дамах жедай хьтин агалкьунар хьун чи мурад я.        

КцIар газет

Добавить комментарий

Ваш адрес email не будет опубликован.