Дарвин кьетIен кас тир. ТIварни кьетIенди тир, акунарни, кьатIунарни, ийизвай крарни.
Аялвал Грозныда фенвай Дарвина са юкъуз чIехи стхадихъ галаз художникрин мектебдин виликай фидайла чIехи стхадин “вавай ина кIелиз жедани?” -лагьай суалдиз -«эхь» жаваб гана. Гьа мектебдиз имтигьан гайи пакад юкъуз мектебдик акатнавайбурун тIварар кьазвай. ЦIиргъина вичин тIвар ван тахьайла Дарвиназ чIехи стхадикай регъуь хьана. ЦIиргъ куьтягь хьайидалай кьулухъ Дарвиназ эвер гана ам мектебдин сад лагьай ваъ, кьвед лагьай синифдиз кьабул хьана лагьайла адаз вичикай халис художник хьанавайди хьиз хьанай. Художник хьуниз гьазур хьанатIани мектеб куьтягьайла Дарвин вучиз ятIани Грозныдин Физкултурадин Институтдиз гьахьзава. Институтда кIелзавай чIавара советри къадагъа авунвай каратедални машгъул жезва. Хтана Магьачкъалада сифте яз каратедин секцияни ахъайзава. Художниквилялайни гъил къачузвач. Вичин кIе- лунар Мухинан тIварунихъ галай Ленинграддин художникрин мектебда давамар хъийизва. Анаг куьтягьна са кьуд йис Магьачкъалада кIвалахайдалай кьулухъ ам хзанни галаз Бакудиз куьч жезва. Амай уьмуьр вири Бакуда кьиле тухванатIани ада мугъул чIалал рахаз чирзавач. ГьакI ятIани адаз вичин талантдиз килигна мугъулрин арадани чIехи гуьрмет авай. Идаз килигна 2014-йисуз Дарвинан Бакуда кьиле фейи кьилди фыставка ахъайдай мярекатда Азербайжандин художникрин кIватIалдин кьил Фаргьад Халиловни, атай мугьманарни вири Дарвинан хатурдай урусдал раханай.
Дарвинан Бакуда авай ученикрикай халкьдин художникар хьанатIани адаз чи девлетдин патай са тIварни ганач. ТIвар къачун патал кьил агъузна канзавай, Дарвиннахъ лагьайтIа ахьтин къилих квачир. Эсерар къецепатан уьлквейрин музейра, гьакIни кьилди ксарин коллекцийра, Республикадин Алай ЧIаван Хару сенятдин музейдин, гьакIни Европадин уьлквейрин са шумуд пасолдин кIвалин цларал алатIани адав са кIусни дамах гвачир. Вичи шагь эсер гьеле чIугнавач лугьузвай. Гила адан шагь эсер чаз туна фейи КЪЕНИВАЛ хьана. Ам къенивилин эталон тир.
Эхир вахтара Блавацскаядин эсеррихъ галаз таниш хьайидалай кьулухъ эзотерикадал, лингвистикадал машгъул жезвай. Дегь чIавара чи чIалан гелер жагъурзавай. Кхьена чап тавунвай шумуд эсер, чIугуна кьилиз акъуд тавур шумуд табло тунатIани гьеле чарцел акъуд тавунвай гьикьван фикирар гваз фена Дарвина.
P.S. Са диндални чIалах туширтIани, аллагьдал, тан фена руьгь амукьунал чIалах тир. Чунни Дарвинан чIехи руьгь чахъ галаз амукьунал чIалах я.
Аламви