Играми Руслан Шейдаев! Ваз пудкъад йис хьанва лагьайла заз чIалах жез канзавач. Вучиз лагьайтIа, заз аял чIавара пудкъад яшар хьанвай итимар чIехи бармакар алукIна, къуьнерик кавалар вегьена кимерал ацукьна, заланз-заланз рахадай, яваш-яваш экъведай, жегьилриз меслятар гудай рехи ксар хьиз чидай. Вун лагьайтIа, гьа заз акур йикъалай цицIи, викIегь, са чкадал ацукьна кьарай текъведай, къваз тавуна галтуг-катуна авай Руслан я.
Чун таниш хьайи югъ зи рикIел алама. Зун студент тир кьудкъанни цIуд лагьай йисара Бакуда са мехъерик и Камран ваз чидани лагьана са мукьада зун ви патав гъанай. А чIавара вун Бакуда кIвал-югъ, магазин авай, жемиятда жуван чка кьунвай са жегьил кас тир, зунни студент. Чун сад-садахъ галаз кьуна дуст хьунин себеб чун са чIалал рахун ва са хуьряй хьун ваъ, чи кьведанни фикирар, халкьдин вилик къвазнавай проблемар гьялдай рекьер сад хьиз акун хьана. Усман Къенберован «Лезгистандин хабарар» М.Меликмамедован «Лезги тIвар алатIа», Фейруз Беделован «Миф», Расим Гьажидин повестарни эссэяр чи танишвилин сифте камар тиртIани гуьгъуьнай «Самур» културадин кIватIалда чун санал лигим хьанай. Гуьгъуьнай зун комерциядин рекьиз атунани ви куьмекни пара хьанай. Вири уьмуьр Бакуда кьиле тухванвай ваз, и халкьдин менталитет, гуз-хчунрин къайдаяр залай хъсан чизвай.
Бакуда лезги радиодин сад лагьай диктор Гуьлбагьар Айдунбекова хьанатIани, вуна жуван ванцив ва кьатIунрив ана жуван гаф къедалдини лугьузма. Гила вун устад Келентеран чкадал радиодин лезги гнугрин редактор ятIани парабуруз вун диктор хьиз чизма. Гьавиляй ваз парабуру лезги Левитанни лугьузва.
Вунани Абир малимди Бузовнадин юкьван мектебра мажиб галачиз лезги чIалан тарсар гузвай вахтарни зи рикIел алама. Вуна «Сувар» ансамблда концертар тухунихъ галаз санал маниярни лагьай вахтарни зи рикIелай алатнавач. Вуна Абир малимдихъ галаз Бузовнада туькIуьрна кьилиз тухвай чи културадизни литературадиз талукь тир мярекатарни рикIелай физвач, уьмуьрдин эхирдалди зари Келентераз къалурай къайкъуярни.
Ругуд лагьай цIуд яшариз кам вегьейдалай кьулухъ хайи чIал мадни хъсан чирзавайди я лугьуз Магьачкъаладин Девлетдин Унверситетдин филологиядин факултетдин хайи чIаларин отделениядиз кIелиз фин парабурувай кьабулиз тежедай са кам тир. А камни на вегьена. Ана вун чи туькIуьрзавай интеллигенциядин векилрихъ галазни мукьувай таниш хьана. Асеф Мегьман, Азиз Алем, Гьажи Гашаров, Фейзудин Нагъиев, Ризван Ризванов, Мегьамед Гьуьсейнов… Абурун уьмуьрдин мектебарни вуна кIелна. Иллагь хьи, кхьинарни, кьатIунарни тухузвай уьмуьрдин гармония сад тир Асеф Мегьман. Ам Бакуда ваз мугьан хьайи пакагьан юкъуз сергьят авачир ви шадвилин хъверни зи рикIел алама.
Советар чкIайдалай кьулухъ садвалистрихъ галтугзавай береда, са бязибуруз зи тIвар кьаз кичIезвай чIавара, Хачмасдин туьрмедиз Келентeр малимни галаз зи патай атай вахтарни зи рикIалай фенвач.
Бес «Алам»?…
Бес «Марвар»?…
Мад гьикьван проектар жедатIа низ чида. Къе чавай парабурувай Бакуда вун галачир са културадин мярекатни кьилиз гъиз жезвач. Вун къе Бакуда чи лезги културадин эталонрикай сад хьанва лагьайтIа за садни алцурдач.
Ваз чи рикI алай зари Фейзудин Нагъиева бахшнавай са шиирда лагьайвал:
ЛуькIуьнрин аслан –
Руслан рахазва!
Лезги халкьдин ван
Масан рахазва!
Зи халкьдин хъсан
Инсан рахазва!
Яб це, Лезгистан,
ТаратI вине кьан,
Чи мурадрин дагъ
Кьакьан рахазва!
ВикIегь рикIни тан,
Алпан вацIун ван,
Мерд рикIиз дарман
Кьур, къван рахазва!
Мидяйриз дуван –
Лезги Левитан.
ЧIалалди жуван
Ватан рахазва!
Пудкъад яш жегьилвилин кьуьзуьлвал, гьакIни кьуьзуьвилин аялвални я лугьуда. Гила ни гьикI кьабулуниз килиг тавуна заз вун гьа чун таниш хьайи кьудкъанни цIуд лагьай йисарин зиреквиле, цицIивиле, оптимиствиле, жегьилвиле аваз аквазва.
Ваз и жегьилвал мубаракрай зи играми рикIин дуст, Руслан!!!
Камран КЪУРБАНАЛИЙРИН