АЛАМДИВ АГАТЗАВА

Журналдин нубатдин-июндин тилит гьам цIийи авторралди, гьакIни темайралди дикъет желбдайди хьанва.

И тилит коллективдин кьетIен проектрикай тир «Лира» тIвар алай музыкадин конкурсдин итогрикай, ЭчIехуьруьн мектебдин гъенел Мегьман Абдуллаеван гуьмбет ахъа хьуникай репортажралди ахъа жезва.

Гзаф вахтунда кхьинриз ара ганвай шаир-журналист Гьилал Аскерова вичин халу, патриот-шаир Иззет Шарифован уьмуьрдикайни яратмишунрикай рахазвай «Шаиррихъ маса бахт жедач» тIвар алай макъала, Рзабала Агъабалаеван уьмуьрдикай Къурбаналийрин Камрана къелемдиз къачунвай «Жегьил Могьсуьн Санани» кьил алай къейдер маракьдив кIел жезвайбур я.

Жегьил автор Серхан Ярагьмедова «Туьркиеда лезгияр» тIвар алаз гьазурнавай рекьин  къейдери ва чкадал чIугунвай шикилри журналди вичин сергьятар гегьеншарзавайди субутзава.

Журналдин кьакьан ериди, коллективдин авторрик галаз кIеви алакъади тIвар-ван авай алим ва шаирарни гъиле къелем кьуниз “мажбурнава». Техникадин илимрин доктор профессор Эшреф Баламетова чи дуьня вахтсуздаказ дегишарай зурба алим ва патриот Тарикъули Эмирасланов рикIел хканвай макъалади, шаир Арбен Къардаша устад сеняткар Сажидин Саидгьасанован 80 йисаз талукьарнавай эсседи, шаир-публисист Билал Адилован алим Эдгьем Шагьмурадовахъ галаз маракьлу ихтилатди и тилитда чка кьунва.

Шаир Римма Гьажимурадовади вичин кIелчийриз прозадин шиирар ва Шагь-Эмир Мурадован яратмишунрикай рахазвай «Дуствал рикIиз илифарай шаир» тIвар алай макъала бахшишнава.

Чи чIалан хизандик алатзавай халкьарикай тир къиризрикай Абир ЭчIехвидин, Кесиб Абдуллагьан яратмишунрикай Сейфеддин Бедирханован макъалайри, Михаил Лермонтован Билал Адилова чи чIалаз-элкъуьрнавай шиирри, профессор Ярали Яралиеван, шаир-публицист Ризван Ризванован къейдери кIелзавайбуруз бес кьадар чирвилер гуда.

Шаир, филологиядин илимрин доктор Фейзуддин Нагъиеван шаир Арбен Къардашаз жаваб яз кхьенвай “ВацIуз гьахьдалди, улам жагъурун хъсан я» ва лезги чIалан муаллим Куругъли Ферзалиеван «Вучиз кьве жуьреда кхьизва?» макъалайралди журналди гьар са изданиядиз гереклу тир дискуссийрик кьил кутунвайди ашкара жезва.

Журналда гьакIни жегьил авторрин шиирар цIийи ктабрикай, конкурсрикай малуматар чапнава.

Квевай и тилит «КцIар» газетдин редакциядай гъиликиз жеда.

«КцIар» газет

Добавить комментарий

Ваш адрес email не будет опубликован. Обязательные поля помечены *