Шаирар рекьидач

И йикъара Бакуда, «Насир» чапханада муаллим-шаир Мегьди Пашаеван «Кьуьхуьриз ша» тIвар алай шииррин ктаб чапдай акъатнава. ЦIийи ктабда кирамдин хайи ватандин дагъларин, вацIарин, чарчаррин, булахрин, яйлахрин ва тамарин иервилерикай, абуруз сагьибвалзавай халкьдин такабурвиликай, хъсан ва мили къилихрин иеси хьуникай вичиз махсусвилелди къелемдиз къачунвай шиирар кIватI хьанва. Ктабдиз сифте гаф кхьенвайди Азербайжан республикадин лайихлу журналист, Видади Севзиханов,  редактор «АЛАМ» журналдин къене кардихъ галай «Марвар» эдебиятдин кIватIалдин регьбер, шаир Эйваз Марвар(Гуьлалиев) я.

Мегьди Ягьябеган хва Пашаев 1940-йисуз КцIар райондин Кьуьхуьррин хуьре муаллимдин хзанда дидедиз хьана. 1963-йисалай авална 47 йисуз юкьан  мектебда муаллимвал авур шаирдиз хайи хуьруьн чарчарар, мурк хьтин къайи булахар, къацу яйлахар, гегьенш никIер ва зегьмлу рагар илгьамдин чешмэ хьана. Мегьди Пашаев 22 яшиндалай хзандихъ галаз санал Кьуьхуьрай убадиз куьч хьанвайтIани, дуьнедиз сифте вил ахъайай хайи макан масан са чка хьиз гьамиша рикIе хуьзвай. Вичин сад лагьай ктабдал «Кьуьхуьриз ша» тIвар эцигунни и канивиликай вилик акъатнавай кьастI я, лагьайтIа чун ягъал жедач. Шаирди хайи Кьуьхуьрин  иервилер теснифзава ва виридаз хуьруьз эвер гузва:  

Шагьдагъ такур кас аватIа,

Ша чи хуьряй килиг садра,

Булахрин яд хъваз кан ятIа,

Кьуьхуьриз ша, Кьуьхуьриз ша.

 

Лекь элкъведай кьакьан синер,

Виш дердиниз дарман цуьквер,

КандатIа ваз дагъдин миргер,

Кьуьхуьриз ша, Кьуьхуьриз ша!

 

Шумуд йис я, вахъ вил галаз,

Мегьдидиз вун акуна канз.

Захъ галазди «Хъучал» къугъваз

Кьуьхуьриз ша, Кьуьхуьриз ша!

 

Амма бубайри лагьайвал, «кьисметдалай артух нез жедач». Эхь, 2013-йисан январдин вацра вичин дуьне дегишарай шаирдиз я хайи хуьруьз хъфин, яни вичин хтул Акиф Агъакеримован спонсорвилелди экуьнал акъатай «Кьуьхуьриз ша» тIвар алай сад лагьай ктаб акван кьисмет хьанач. Амма «шаирар рекьидач», лагьай Л. Нямет гьахъ я. Эхь, и дуьняда чпелай са вуч ятIа туькIуьриз алакьайбрун тIварар  кьейидалай кьулухъни  кхьей шиирралди, баркаллу  амалралди канибурун рикIера амукьда. 

                                                                                    «АЛАМ»

Добавить комментарий

Ваш адрес email не будет опубликован.