Вар ахъайин жегьилриз

 Хийир-дуа гузвайди Эйваз МАРВАР я.
Заз са  чIавуз са тIал авай.Чи поэзияда цIийи тIварар аквазвачирвиляй. Чун «МАРВАР» яз къе и кардин къене ава. Ихьтин  жегьилар  ава, амма  къекъвена  абур  арадал  акъудна, рехъ  къалурна, руьгь кутуна  канзава. Чи межлисдин куьд лагьай мярекатда чаз кьве жегьил шаир авай. Кьве цIийи  нефес, кьве цIийи тIвар, цIийи  стуьл  цIарар. Чи шиир, чи поэзия датIана жегьил амукьрай, цIийи жегьилар атурай.

ГУЬЛАМИРОВ  РАДЖИ  ХАЛИДДИНАН  ХВА
1997-йисуз  августдин 16-даз  КцIар райондин ЧIакIар  хуьре  дидедиз  хьана.
Алай  чIавуз хуьруьн юкьван мектебда ХI классда кIелзава. И шиирар кхьизвай жегьилдиз са хъсан бахт ава. Адан литературадин муаллим чи играми филолог Зиятхан Мурадханов я. И гадади шиирар Азербайжан ва лезги чIаларал кхьизва, гьакIни хуралай лугьуда. Чан Раджи, «АЛАМ»да вегьизвай и сифте кам уьткемди хьурай ви.

ДИДЕ

Рехъ алатна яргъариз зи.
Зун гъурбатда авайтIани,
РикI  датIана  патав  гвай  ви.
Гъариб  хьана диде  вунни.

Вун  галачиз  заз  гьар  са  югъ,
Са азаб тир, рикIин  тIал  тир.
Ви патав хьай зи  гьар  са  югъ,
Зун патал са хуш  хиял  тир.

Вун зи  диде, вун  зи вах  я.
Вун  кьван  кани  масад  авач.
Тек  са  вун  я, рикIин  булах.
Вун  кьван  къени  масад  авач.

Аташов  Тачир  Ибрагьиман  хва
1992  йисуз  октябрдин  2-даз КцIар  райондин  ГуьндуьзкIеле  хуьре  дидедиз  хьана. Хайи  чIалал  ашукь тир  жегьилди иер-иер  шиирар  кхьизва. Сифте яз «АЛАМ»да  басма  жезва. Адан  шиирар  кIелайла  са дуру  чешмедин  виляй ргазвай  руьгь  аквада заз. Хъсан  шаир  жедайдал  чIалахъ  я  зун.

Лезги хуьре гьар са кIвале

Лезги  хуьре  гьар  са  кIвале,
Даим  мехъер, шад  мел  хьурай.
Беракат  хьуй  чи  Ватанда,
Кьулан  вацIухъ  гур  сел  хьурай.

Шагьдин  винел  элкъвез  лекьер,
Цавун чина  шадвал  хьурай.
ЧIехи  хьана,  лезги  хуьрер,
Чи  рикIериз  сувар  гъурай.

Бахтавар  тир  шад  суфрадал,
Гьич  иблисдин  ял  тахьурай.
Шад,кубан  хьуй  халкьар  вири
Чилин  винел  къал  тахьурай.

И  Тачираз  кан  я  Ватан,
Зи  деврандал  чIал  тахьурай.
Ватан я  зи, рикIин  дарман,
Зи  Ватандал  чIал  тахьурай.
Мехъер я хуьре

Вуч ийер я зулун бере,
Уях хьанва къе чи дере.
Алатна ван далдам — зуьрне,
Лезги хуьре мехъер я къе.

КIватI хьанва хуьр чамран гъенел,
Жигьил рушар хунча кьилел,
Хуш хъвер ала сусан сивел,
Лезги хуьре мехъер я къе.

Свас иер я бишме алай,
Гъиле чирагъ енге галай,
Чамра чанда ава гур цIай,
Лезги хуьре мехъер я къе!

Нянин кьиляй жеда демер,
Хуш манийрин къведа ванер,
Жигьил дустар ийиз къуьлер,
Лезги хуьре мехъер я къе!

Добавить комментарий

Ваш адрес email не будет опубликован.