“Алам” лезги културадин журналди кьил ктур Лезги Няметан тIварунихъ галай шииратдин конкурсдин гъалибар ашкар хьана.

Гатфарин сад лагьай юкъуз Бакуда лезги литературадал рикI алайбур  мадни “Марвардин” экуьнихъ кIватI хьанвай.  Нупадин кIватIал гьамни “Марвардин” юбилейдин йикъал аватнавай. Са йис идалай вилик чун сад лагьай сеферда литературадин эквел кIватI хьанвайва къе “Марварди” алатай йисан нетижаяр кьилел акъудзавай. И са йисуз «Марвар» цIудра кьиле фена, 4I касди и кIватIалра иштиракна. Абурун арада чи тIвар-ван авай зарияр, журналистар, художникар, манидарар, гьакIни рикIе лезгивал, виле ракъарибвал авай жуванбур хьана. «Марвар» 5 жегьил лезги шаирди чпин сад лагьай камар вегьей чкани хьана.
Юбилейдин йукъуз кIватIалдал атанвай мугьаманари “Марвардиз” чпин рикIей къвезвай гафар, баркаяр гъанвай.
Са йис идалай вилик «Алам» журналди Лезги Няметан тIварунихъ галаз литературадин конкурсдиз авалнавай. Конкурсда авторри лезги чIалалди кхьенвай, садрани чап тахьанвай прозадин эсерралди, гьакIни хайи чIалаз талукь кхьенвай шиирралди иштиракзавай. Жуьридихъ чи тIвар-ван авай зарийри чка кьунвай конкурсда I5 шаирди иштиракна. Абурун арада жуьридиз виридалай гзаф хуш атай шиирар Римма Гьажимурадова, Эйваз Гуьлялийрин ва Шагьмардан Агъакишиеван чIалар хьана. ЧIалакай виридалай хъсан шиирдин автор чи ханум шаир Римма Гьажимурадова (“Зи лезги чIал”) хьана. Гъалибдиз «Алам» журналдин редакциядин  диплом ва премия гана. Барка ийизва чна куьн, Римма ханум!

Анар Уьнуьгъви, Баку
«Кцlар» газет

Зи лезги чIал
Нурарилай ал ракъинин
Вуна къуват къачунвани?
«Ви чIав фенва…»-лагьайтIани,
Жуван елкен ахъайна генг,
Заманайрин хурал вуна,
Игитди хьиз тухузва женг!
Чи бицIекрин мецел къвана,
ЦIийи кьиляй цуькда вуна.
Гьар сесина, гьар гафуна
Чи Къаф сувун ни, ял гала,
Вучиз, ва зи шиир скьал
Къвезва кьакьан хиял галаз?

Зи дидед чIал, къванцин ни квай!
А ви хурал ахварик квай
Ахъа жерла сирер, давар,
Акьазва лап дуьз рикIелай!
Тапаррин мез галкIизва гьикI,
Экъис жезва гьахъ руг алай!
Къул я чими чи гьар са хур,
Агата, дуст, хамир хатур,
Туш зи чIалан гуьзгуь какур,
Дуьз рахада ана тарих:
Пелазг баде, Алпан буба…
Чахъ суй ава михьи, ари.

ЦIун дигедин цIай галай чIал!
Авач чидайд ви яш, ви чIав…
Чи дагъларин кукIушни рав
Ви яшдаван, низ чида низ?
Заманади вичин сирер
Чуьнуьхариз, гагьни чIуриз…
Алатна фей агъзур йисар
Ийизва на такур кьасар.
ЧIаларин вун хару, масан
Вах яни вун, диде яни?
ЧIалаз тахай килигайтIа,
Дав жеда ви, гуьгьуьл, мани…

Вун Гъуцари чав гайи нур,
Лезги халкьдин ван я вун гур.
Вахтуниз на ганва кучIур,
Эгьрамрилай зи вини чIал,
КIариз физва асирар на,
Зи игит чIал, зи къени чIал!

Добавить комментарий

Ваш адрес email не будет опубликован.