Ахцегьа кьиле фейи «Шарвилдин» Суварик чи къве ватанэгьлидиз машгьур эпосдин игитдин тIварунихъ галай премия гана.
Адет яз гьар йисуз июлдин эхиримжи кишдиз кьиле физвай «Шарвилдин» Сувар Сив кьунин вацрахъ галаз санал аватзавайвиляй 2-августдиз къейд авун къарардиз къачунвай. Гьа юкъуз синоптикри дагъларин ценера экIя хьанвай къадим Ахцегьа марфар къвада лагьана хабардарвал авунвайтIани, чилел стIални аватнач. Белки кIвалин иесияр Дагъустандин ва Азербайжандин цIудалай виниз райондай атанвай мугьманрин вилик уьзягъ хьурай лугьуз. Экуьнин яралай КIелед хивелай чи къадим авазрин, адетдин суварик эвер гузвай макьамрин ванери лув гана. Агъул райондай атанвай кьуьлеринни манийрин ансамблди шадвилин межлисдик кьил кутуна.
Мугьманар и къадим лезги макандин дегь куьчеяр кьуна экъвена, музейра кьил акьурна, гураррай винелд Шарвилидин майдандал хкаж хьана. Ахцегьрин саки вири магьлеяр суварин майданриз элкъвенвай. Асул мярекаяр Хуьруг Тагьиран тIварунихъ галай паркина тешкилнавай. Ина фрирандай виридуьнядин турнирдин финалдин акъажунар кьиле фена. Урусатдин векил Михаил Исаев турнирдин гъалиб хьана. Нисиниз мукьва Валентин Эмирован тIварунихъ галай паркини гала-концертдин гьевескарар кIватIна. Килигзавайбуру Мегьамед Элекберов, Фаризат Зейналова хьтин машгьур манидарар сегьнедай гурлу капар ягъуналди рекье туна. Дербент шегьердин крар кьилиз акъуддай властдин чIехид тир Имам Яралиева, чкадин регьбер Усман Абдулкеримова мугьманриз хваш-беш авурдалай гуьгъуьниз Шарвилдин цIувад лагьай суварин лауреатар баянарна. Бакуда акъатзавай «Алам» журналдин кьилин редактор Камран Къурбаналиев лезги култура системадик галаз чирунай, милли журналистика вилик тухунай; Дагъустандин халкьдин шаир Ханбиче Хаметова чи литература вилик тухуник зурба пай кутунай; «Лезги газетдин» кьилин редактор Агъариза Саидов милли журналистика вилик тухунай, «Шарвили» эпос теблигъ авунай; шаир, алим Азиз Мирзебегов илимдинни литературадин хиле яргъал йисариз гьакъисагъ зегьмет чIугунай 100.000 рубл кьадардин «Шарвили» премиядиз ва грамотайриз лайих акуна. Шад жедай кар я хьи, цIинин лауреатрикай кьве кас-Камран Къурбаналиев ва Азиз Мирзабегов чи районэгьлияр я. Чна лауреатар тебрикзава, чпихъ мадни чIехи агалкьунар хьун тIалабзава.