Чи дуст Aбир

Вичи гзафбурукай чуьнуьхарнатIани, Абир ЭчIехвидин 60 яш алукьун заз сир хьанач. Вучиз лагьайтIа, чун таяр-туьшер я. Кведанни 50 йисан юбилейриз талукь макъалаяр «Самурди» са-садан къвалав ганвайди тир. (Гьелбетда, 10 йис идалай вилик). Гьадалай инихъ чун дуст хьана, ада вичин малум пуд алфавитдин «куьмекдалди» лезги чIалал кхьенвай макъалаяр чаз ракъурна, «КцIарин» актив са автордиз элкъвена.

Зи дуст Абир къени къилихрин инсан, талант авай интеллигент, рикIин къеняй патриот кас я. Ам вири хьиз туш. Рагьмет хьайи Лезги Нямета «кьведра кьвед кьуд хьунални шак гъана канзава»-лугьудай. Абираз вичин машгьур хуьруьнвидин и гафарин ван атун-татун заз чидачтIани, адаз датIана амалзавайдан шагьид я зун. Тарихда, этнографияда, адетра чаз саки малум тир  вакъиаяр, субутар, мизанар ада вичин фагьумдалди элкъвез-хквез тIупалай хъийида, юкьвал цIийи фактар, делилар ахкъудда. Муругърин мискIиндихъ чи пуд диндиз талукь  артефактар галайди низ чизвай? Бес КIурринни Мучугърин арада хуьр хьанвайди?…

Акуна ваз Абира телеканалрин сада интеллектуал акъажунра иштиракна гъалибвал гъиликзава, садазни хабар авачиз 58 яшинда студент жезва, чи цIахур, гьапут… стхайрал илифна жузун-качузунзава…

Гьа ихьтин са кас я Абир ЭчIехви. 60 яшинда саки кьвед лагьай нефес ахъа хъханва чи дустунин: са кIвач Бакуда, сад хайи хуьре, Ахцегьа, Кьвепеле… ава адан. Ара датIана рехъ атIузва, шикилир ягъазва, макъалаяр кхьзва, полемикайрик экечIзава… 

60 яш мубаракрай, Абир муаллим! Ви кIвачерихъ гьамиша звер, чанда уьмуьрдин цIийи-цIийи кукIушар муьтIуьгъардай къуват хьурай, дуст кас!       

Видади
КЦlАР газет

Добавить комментарий

Ваш адрес email не будет опубликован.