Лезги зарийрин эсеррай атIузвай цIарар

Вичиз рехъ чин тийирдивай, масад рекье тваз жедай туш,
Кан хьуналди кьемкьердивай, вечрен кака хаз жедай туш.
Лезги Нямет

Дуьнядин вири дердер чIавар финивай рикIелай алатдайбур я.
Садлагьай югъ азаб ятIа, кьведлагьай югъ хажалат, пудлагьай югъ регъуьвал, кьуд лагьай югъ «хьана, алатна» жеда.
Фейруз Беделахтул

И дуьнья къе хьанва лаларин алем,
Вучда за, хадани гъилевай къелем.
Медет Эрзиманов

Кесибда лагьайтIа акьуллу фикир,
Гижидай гьисабда вирида факъир.
Иззет Шерифов

Намусни кваз эцигнава терездал,
Вучиз икьван чIур хьанава, дуьня, вун?
Магьсим Магьсимов

Мал-девлет кан жемир, нефс хуьх жуван,
Пулари ийидач чIанади кIубан,
РикI михьи, ният саф, кесиб ятIани
Лап зурба хандилай винева чубан.
Билал Адилов

Итимдикай касзавайди дишегьли лигим.
Дишегьлидкай пабзавайди итим я, итим.
Вакъиф Муьшкуьрви

Маса ксар садрани лукI къамир на,
Жувни лукI хьун, жуван хиве твамир на.
Лезги Бегьлул

Ватандин накьварин гуьрчеквиликай фикирзава за:-гьа са юкъуз КцIара гад, СтIура зул, Арчана кьуьд тир Ватандин.
Видади Севзиханов

На гатфарин тарифармир, гатфарилай гад хъсан я,
Къарих чIавуз хъун паталди шербетдилай яд хъсан я.
Асеф Мегьман

МичIи йифер мичIи жеда, лал жеда.
Римма Гьажимурадова

Акьул це инсандиз, жез тахьуй гьеси,
Чирвилер мугьман я, акьул иеси.
Эйваз Гуьлалийрин

КIватIайди Тачир Аташов я

Добавить комментарий

Ваш адрес email не будет опубликован.