Октябрдиз «СтIал Суьлейман» райондин лезги чIалан методист муаллим Н.М.Мегьамедова кьиле аваз нубатдин лезги чIаланни литературадин муаллимрин семинар КIварчагърин юкьван школада кьиле фена. Санлай къачурла, райондин маса школайрай атанвай дидед чIаланни литературадин муаллимрин кьадар 20-алай артух тир.
Семинардин кIвалах муаллимри гьазурнавай ачух тарсарикай, классдилай къеце тухузвай тарсарикай, шаиррин ва алимрин юбилейриз талукьарнавай мярекатрикай ва цIийиз кьабулнавай федерал гьукуматдин образованиядин стандартрикай (ФГОС) ачух ва гегьенш суьгьбетрин гьалара кьиле фена.
Лагьана канда, семинарда рахай юлдашрин фикирар, ачух тарсар ва классдилай къеце тухузвай тарсар кьиле тухвай муаллимрин кIвалах вири амай иштиракчи-муаллимри, КIварчагърин юкьван школадин муаллимрин педколлективди лап хъсан къиметар гуналди къейд авуна. Гьелбетда, са бязи муаллимрин тарсарикай тамамдиз рахун мажбур жезва.
КIварчагърин юкьван школадин дидед чIаланни литературадин муаллим Селгьехалум Сейфуллаевади «Алкьвадар Гьасан-Эфендидин уьмуьрдин рехъ ва яратмишунар» тIвар гана гьазурнавай ачух тарс, лезги халкьдин зурба шаир, вич алай йисуз рагьметдиз фейи «Байрам Салимован уьмуьрдин рехъ ва яратмишунар, гьакIни «РикIикай риваят» темадай КIварчагърин юкьван школадин дидед чIаланни литературадин муаллим Эзбербегова Джамиляди тухвай ачух тарс муаллимри гзаф хушдаказ кьабулна.
Семинардин мярекатриз талукь яз тарсарин нетижаяр кьадайла методист-муаллим Назират Мегьамедова, Испикрин, Шихидхуьруьн юкьван школайрин дидед чIаланни литературадин муаллимар – Марсел Ризаев ва Наира Шихнабиева рахана.
Муаллимрин семинардин эхирдай СтIал Суьлейман райондин лезги чIалан методист Н.М.Мегьамедовади вири иштирак авур муаллимриз, чирвал къачузвай, тарсара хъсандиз иштиракай аялриз, КIварчагърин юкьван школадин муаллимрин дестедиз разивилелди паракьван сагърай лагьана. Мярекат эхирдай КIварчагърин юкьван школадин завуч Пирмет Байрамбегова семинардин иштиракчи муаллимриз сагърайдин гаф малумаруналди ва Н.Мегьамедовади семинардин нетижаяр кьуналди акьалтIарна.
Марсел Ризаев,
Испикрин юкьван школадин лезги чIаланни литературадин муаллим, шаир- журналист