Вилаятар чкIиз арадал хкведа. Чилер, сергьятар са шумудра гъиляй-гъилиз фида… Амма чIал хвейи миллет сагъ амукьда. Са вахт къведа – халкьди уьтквем кьегьалар хада. А кьегьалри бубайрин чилерни вахчуда, ватанни чкадал хкида.

Гьажи Давуд Муьшкуьрви

Кесибди гайитIа акьул,
Гьич садани ийидач кьабул.
Пул хьайила, кицIин гурцIул
Межлисдин итим тушни бес?!

Ахцегь Гьажи

ЧIал – миже я дидейрин
Михьи, гьалал некIедин.
Азадвилин женгера
Чи бубайрин гьекьедин.

Зерифа

Инсан лекь хьиз чуьнуьх жеда рагара,
ЦIакул тIимил хьайи чIавуз лувара.

Куьре Мелик

Артист Крамарован вилер са тIимил чапрасбур тир. Ада, Америкадиз куьч хьайила, операция авуна, вилер дуьзарна. Инсандал хьиз адал са тIимил артух мишреб атана, амма артист хьиз ам «кьена». Дуьз вилер авай Крамаров садазни бакара амукьнач. Шаирни гьакI я: эгер вичин жуввал авачтIа, ам шаир туш…

Майрудин Бабаханов

Салам гана фейи кIвале дишегьлидиз
пис килигмир,
На бахчада ви къелемдал чIуру тарцин
тIур илигмир.

Асеф Мегьман

И дуьня, гьалдайдаз балкIан я, ялдайдаз – пар.

Расим Гьажи

Гьар шеъинихъ кьве чин ава,
Инсанвилихъ сад.
Кьве чин алай инсан авай
Хуьрни я барбатI.

Лезги Нямет

КвадарнатIан лезги пекер,
Лезгидин руьгь квадарнач за…

Келентер Келентерли

Заз авайди са къибле я,
Са иман я, са дин я.
Дуьня вири са патахъ хьуй,
Дидедин чIал зи кьин я.

Гуьлалийрин Эйваз

Багъиррин Рауф
КIурви,
АТУ-дин студент