Гъалибвалин суварин 70 йисан юбилейдиз талукь яз, и мукьвара Бакудавай лезгийрикай экуь ксарин са тилитди «Сейли сурарал» фена Дагъустандин вири халкьарин арадавай дяведин йисара генерал хьанвай кьве лезгидикай сад тир Магьмуд Абилован сур зияратна, сурал цуькер эцигна, ругьдин вилик икрамвал къалурна. Дуьз 70 йис идалай вилик, 20.04.1945 тарихдиз СССР-дин Халкьдин Комисаррин Советдин кьарардалди 47 йисавай Магьмуд Абиловаз генерал-майор тIвар ганвай. Мярекатдин кьиле Азербайжанда акъатзавай «АЛАМ» лезги културадин журналдин редакциядин коллектив акъвазнавай. Сурал атанвайбурин арада чи халкьдин интеллигенциядин векилрихъ галаз санал гзаф жегьиларни авай. Зияратдин мярекат «Алам» журналдин кьилин редактор Къурбаналийрин Камрана ахъайна, кьегьал генералдин уьмуьрдин легьзейрикай рахана. Ахпа гаф жегьилриз гана. АТУ-дин студент Багъиррин Рауфа лезги чIалалди, Туризм Университетдин студент Фарид Селимова урус чIалалди, АДИУ-дин студент Фуад Гьайдарова мугъул чIалалди ва ЧIаларин Универсистетдин студент Рамик Багиева ингилис чIалалди генералдин уьмуьрдин рекьикай малумат гана. Гуьгъуьнай генералдин руьгь рикIел хкай ва гаф лагьайбурун арада генерал- полковник Яшар Айдемиров, профессор Эшреф Баламетов, техникадин илимрин кандидатар Элман Хелилов ва доцент Дуьнямеддин Аскеров, гьакIни «Самур» ЛММ-дин чIехидан муавин Имран Рзаев авай. Абуру ихьтин инсанар садрани рикIелай алудна кандачирди, абурун уьмуьрдин рехъ ва къагьриманвал чи жегьилриз са чешне тирди къейдна.

Генерал Магьмуд Абилован дивизия Берлиндакьван фейи рекье Элба вацIалай алатайла антигитлер каолициядин кьушунрихъ галаз чин-чинал атанай. Генералдин алакьунар Иосиф Сталина, Михаил Калинина ва Америкадин президент Гарри Трумена къейднавай. Къе адан буьст КцIара, хайи КIуррин хуьре, Яламада, тIварцихъ КцIара майдан ва куьче, гьакIни Бакуда куьче ава. 22.08.1998 тарихдиз Азербайжандин президент Гьейдар Алиеван къарардалди, генералдин I00 йисан юбилей республикадин гьавада, хайи уьлкведин кьилин шегьер Бакуда къейднай.

Рауф КIурви