Дуст фена…

Гъиле авай йисан 15-июн тир…
Яламадин сурара инсанрин икьван чIехи сел заз са кьейи чкадални акунвайди тушир. Кьилелай цIай авахьуниз, кьил кудай рагъ хьуниз килиг тавуна инсанар къвердивай пара жезвай. Заз вилер ацIанвай, чеб хуьз тахьана шехьзавай жегьи­ларни акуна…
Зани жув гужуналди хуьзвай…
Дуст гафуниз гьикьван хьайитIани манаяр ава. Инсандиз дустар я сад, яни кьвед жеда лугьуда. Къаннивад йисалай ахпа дуст кьазни жедач лу­гьуда. Дуствиликай гьикьван хьайитIани кьисаярни, хьайи крар рикIел хкайтIани адан мана гьарда вичиз кани жуьреда кьатIида. Зазни къе жува кьатIизвай жуьреда дуствиликай ва дустуникай ихтилатиз канзава.
Ханларан буба Азибегни зи буба Абдултагьир дустар тирди зазни чизвай. Адан чIехи буба Загьидбегни зи чIехи буба Баласултанан дуствиликайни заз Азибегмиди ихтилатарнай. Ханларанни зи гъвачIи стха Эждеран дуствилиз килигна зунни эхир вахтара Ханларахъ галаз пара мукьвал хьанвай.
Яшар чалай хейли чIехи хуниз тамаш тавуна Ханлара чахъ галаз ва чалайни са хейли гъвечIи тир жегьилрихъ галаз дуствалзавай. Вич жегьил тир вахтара вичелай 10-15 яш чIехибурухъ галаз дуствалнатIани, гила ам Яламада жегьилрин далу-даях тир…
Ялама чIехи хуьр я. Лезгийрин вири хуьрерин векилрикай авай и хуьре Чар Урусатдин девирда Урусатдай, Советрин девирда Ирандай куьчарнавайбурухъ галаз, цIийи Азербайжандин девирда таможнядал кIвалахиз ракъурнавайбурун хизанрини уьмуьрзава. Гьавиляйни инаг пара стратежи, гьакIни акахьай чка я. Ина касвилив кьил хуьн гьар са кьегьалдин гьунар туш. Ханлар ина КАСвилив кьил акъудна, вичин крар михьиз кьиле тухузвайбурукай тир. Адан кьилин девиз «заз чараданди кандач, за жуван пайни садавни вугудач», тир. Гьахъвал, дуьзвал, михьивал кани и касдин къвалав хуьруьн вири кьегьал рухваяр кIватI хьанвай.
Виридан кIеве акIай крар туькуьрдай, виридаз дуьз рехъ къалурдай, алакьдай куьмек тавуна акъвазиз жедачир Ханларавай. Гила ам амачирла адан пак чка ичIиз аквазва.
Албеса ваз икир авурай, Ханлар!
ЧIехи Гъуцар валай рази хьурай!
Аллагьди ваз рагьметрай!
Амин!

КЪУРБАНАЛИЙРИН Камран

Добавить комментарий

Ваш адрес email не будет опубликован.