Уьмуьр яргъи хьурай!

Гьайиф чIугвадай кар ам я хьи, чеб лезгияр ятIани, къене лезгидин рикI авачирбурни чи арада кими туш. За, “Алам” журналдин са нумрадай кIелна, ана са «лезгиди» кхьенва, — икьван гъалатIар кваз журнал акъудмир, — лагьана. За винидихъ кхьейвал ам винелай лезги ятIани, адахъ лезгидин рикI авайди туш.
Гьикъван гъалатIар галатIани, адан гъавурда журнал кIелзавайбур битав гьатзава. Са рахунни алач, журнал гилан аямдин девлет я. Ада гьикьван халкьдин адетрикай, мел–мехъер­рикай, тIуьн- хъунрикай, лезгийрин дегь заманрикай кхьизва. Уьмуьр яргъи хьайи журнал­ди тIвар–ван авай халис эркек лезгийрикай чун хабардар ийизва. Ингье са шумуд мисал:
* Шихкеримавай лагьай кьадар пул гъиз хьанач лугьуз, вах стхади дакIанз-дакIанз масадаз гузва. И дерт эхиз тахьай СтIал Саядакай, къене пад кана кабаб хьайила дерлу шиирар кхьидай шаир хьана.
* Акпер Ферзалиев -са хейлин кинойра, кьилин ролар тамамарай лезги хва.
* Азербайжандин халкьдин артстка, машгьур, театрдин режиссер лезги вах Жанет Селимова. Ахцегьрин хуьряй.
* Генералар тир Яшар Айдемиров ва Магьмуд Абилов.
* КцIар райондин Манкъулид хуьряй тир, инсанар дуьнядин дердерикай хабардар авур Кесиб Абдуллагь.
* Алатай I00 йисан 50- 80 йисара Бакуда, Семед Вургъунан тIварунихъ галай урус театрда кIвалахай Михаил Михайлович Лезгишвили. Вичин уьмуьрда адакай лезги хьаначтIани, адан фамилди ам лезги хва хьайиди тестикьарзава. Мисал яз, кесибвилин есирда гьатна хуьряй экъечна фейи жегьил гада Мегьамед, Ленинан саратник жедай кьван дережадив акъатнатIани, вичин агъайнавили (скромны) чан аламаз я Дагъустандиз, я вичин райондиз, я вичин хайи хуьруьз кьван хабарначир. Амма вичелай гуьгъуьниз къведай несилдиз чир хьун патал ада вичин фамил Лезгинцев кхьенай. Адан рухваярни тIвар- ван авай, чIехи дережайриз акъатай инсанар хьана. Лезгинцев, Лезгишвили абур са рахунни алачиз лезги рухваяр тир.
* Вичел чан аламаз, вичин къенепад гьахъсузвилерай ацIана ялавламиш хьанватIани, са ктабни акъудиз тахьай, СтIал Суьлейманаз къаншар Къуба шегьерда дидедиз хьайи Къагьриман Якьубов хьтин гьакъикъи шаир.
* Чаз виридаз лап хъсандиз чидай шаир, композитар ва драматург, гьа и мукьара регьметдиз фейи Асеф Мегьманазни вич рекьидалди рикIяй акъудиз тахьай сифте муьгьуьббат хьайидини, чаз гила «Алам» журналдай чир хьана. Ибур за «Алам» журналдай къачунвай са тIимил мисалар я. Ада лезги чIалан дережадикай гьикьван кхьизва. Чи рикI алай «Алам» журнал ва ам акъудин патал зегьмет чIугвазвай гьуьрметлубур, квехъ ва куь журналдихъ яргъи уьмуьрар хьун чи мурад я.

Рзабала Агъабалаев,
Дагъустандин хару сенятдин лайих кIвалахдар

Добавить комментарий

Ваш адрес email не будет опубликован. Обязательные поля помечены *