Цинин йис чи республикадин президентди мултикултурализмдин йис я лагьана баян ганва. Вичин кьудкъанни цIуд йис ци январдиз тамам хьанвай чи чIехи зари Забит Ризванов гьеле советрин чIаварилай республикада мултикултурализм патал алахъна, женг чIугунвайбурукай сад я. Гьавиляйни чи журналдин коллективди цинин йис чи културада Забит Ризванован йис я лагьана баян гузва. Забит Ризванован уьмуьрдиз ва туькIуьрунриз талукьарнавай мярекатар кьиле тухун, адан чап тахьанвай эсерриз экв къалурун, адан экуь идеяяр халкьарив агакьарун чи вилик квай кIва­лах­рикай жеда.
Сифте яз чна Забит муаллимдин сурал фин кьетIна. Манкъулидхуьруьн юкьвал, агъадай къвезвай зунни виняй къвезвай Эйваз муаллим хуьруьн экуь ксарикай тир Уруж Уружова вилив хуьзвай. Хуьруьн кьулан куьчеяр цIийи асфалтди цIалцIам ва михьи авунвай. Чун сурар галайнихъ элкъвена. Чи пара хуьрерин сурар хьиз Ман­къулидхуьрун сурарни михьи ва къайдадихъ квай. Урусатда уьмуьр­завай са хуьрунвиди — Жабраилов Зейдулла Симейилан хци сурариз гьахьзавай чкада цIийи варар, са тIимил вилик фейила жемят кIватI хьун патал чIехи къур, герек тир зираятар кIватIдай кьве гъвечIи кIвални эцигнавай. ЧIехи гъуцар вичелай рази хьурай!
Чна чIехи зари Забит Ризванован сур зияратна, адан чIехи руьгь шад хьун патал хайи чIалал дуаярни кIелна.
Албеса адаз икир авурай!
ЧIехи гъуцар адалай рази хьурай!
Адан экуь фикирар кьилиз акъуддай рухваяр чи чилелай садрани кими тахьурай!

“АЛАМ”