Агьмедова Луиза Албертан руш, 1993-йисан октябрдин 5-даз Стlал Сулейманан райондин Герейханов хуьре дидедиз хьана. Хайи хуьре мектеб кlелна акьалтIарна, ахпа Магьачкъалада ДДУ-дин филологиядин факултетда кIелнавай и лезги рушаз мадни агалкьунар хьурай. Луизади лезги ва урус чlаларал шиирар кхьизва.

Эйваз Гуьлалийрин

ЧIух хьана зун

Зи цIа кьунвай беден михьиз чIух хьана,
Зун халкьариз шад билбил хьиз аквада.
Дердерикай фикирдайкьван тух хьана,
Эхирни хьи, зун вилерал цIрада.
Квез гьикI жеда шад хъвер ала зи чинал,
Вири крар къулай-дигай бахча хьиз.
Квез гьикI жеда кун тийир хьиз ракъинал,
РикI ацIанва цуьквер алай парча хьиз.
Зун, гьа куьн хьиз, гагь хъуьреда датIана,
Вилерилай зи мур хьана накъвар физ.
Бахтуникай Аллагьди пай атIана,
Бахт амачир есир хьана йикъар физ.

Агь, зун кузва…

Агь, зун кузва, нефес михьиз дар я зи,
Зун мехъерин ван атIанвай зуьрне я,
За вуч ийин жуван кьадар кьисметдиз?!
Садакайни чара тахьай дуьне я.

Зун мехъерин ван атIанвай далдам хьиз,
Са пелешвал зи кьисметдин чешне я.
Зи уьмуьр са яргъи гужлу макьам хьиз,
Садакайни чара тахьай дуьне я.