Жедач завай
Са югъ завай жедач эхиз,
Вун гьинва яр? Лугьуз шехьиз.
Вун акур югъ рикIел хкиз,
Зун рекьида авачиз вун,
Жедач завай галачиз вун.
Пенжердилай вегьена хур,
Вил рекьера жеда алцур.
РикIи гудмаз хурал кцIур,
Жедач рикIел алачиз вун?
Жедач завай галачиз вун.
Хире ийиз рикIе къаван,
Вун авачиз дуьня яван,
Къвазарда за нефес жуван,
Вучда закай амачиз вун,
Жедач завай, галачиз вун.
Яр галачиз
Квахьда ахвар, къведач кьарай,
Акъат тийиз ван япарай.
Акваз жеда заз ахварай
Рагъ гьикI ятIа зар галачиз,
Зунни гьакI я, яр галачиз.
Хам кудайвал алкIана цIай,
Шехьда зи рикI ийиз гьарай,
ИчIи акваз ацIай сарай,
Рагъ гьикI ятIа зар галачиз,
Зунни гьакI я, яр галачиз.
Са цуьк я зун, рангни яру,
Ярди хвейи къуш я хару.
Чепелукь хьиз тухвай гару
Рагъ гьикI ятIа зар галачиз,
Зунни гьакI я, яр галачиз.
Мекьизва
Зи тандилай алахьиз зуз,
Ксуз тежез хъуьтIуьн цкIиз.
Кьуна къаю къужахда пис,
Мекьизва заз, мекьизва,
Зун мекьила рекьизва.
Япарилай алатиз гар,
СакIани заз тагуз ахвар,
Йифди авахьзава чIутхар.
Мекьизва заз мекьизва,
Зун мекьила рекьизва.
Незавай фу туна зуракI,
ГъвечIи кацни гатда хьрак,
Къайи зурзун акатиз захъ,
Мекьизва заз мекьизва,
Зун, мекьила рекьизва.
Муркадини кьуна шуьше,
Нехиш ягъан ялда пеше.
Ракъин чимни тефиз ише,
Мекьизва заз, мекьизва,
Зун мекьила рекьизва.
Лап чIижери гайи хьиз хуз,
Къвезва къай- фул, нефес атIуз.
Кудна цавай цифери пIуз,
Мекьизва заз мекьизва,
Зун мекьила рекьизва.
Акваз вилиз жив, ранг ачух,
Ийиз къалин жуван алух,
Кьилел алаз йисин яйлух,
Мекьизва заз мекьизва,
Зун мекьила рекьизва.
Ахвар тир
Яр атана кьуна зи гъил,
Хвеши хьана шехьна кьве вил.
Дуьня рикIел амачир зи,
Ашкъидивди акахьна кьил.
Багъиш ийиз къеневай рикI,
Залай яргъаз алат тийиз.
Заз килигиз, рахазвай ам,
Квелин тийиз, галат тийиз.
Шад тир кьведни лугьуз-хъуьрез,
Кьилел ачух цавар тир.
Лагьайкьванбур, гьайиф за квез,
Йифиз акур ахвар тир.
Лагь шумудаз кан хьана
Алатна фей йикъар хукваш рикIел на,
Шумуд гада тунатI жувахъ цIигел на.
ТIварар хукваш сад-сад жуван мецел на?
Парабуру ви тIвар кьадай ван хьана,
Вун дуьнядал лагь, шумудаз кан хьана?
Лагь вуна заз, шумуд хьана пехил вал?
Шумуд рикIяй акуна ваз пехилвал,
Масадбуруз татурай ван, лагь япал.
Заз парабур вал вил алаз ван хьана,
Вун дуьнядал лагь шумудаз кан хьана?
Лагь вуна заз вун акурла шумудаз,
Лап экъведай гьевес къведай шулудаз.
Ваъ, лагьайла жибин ацIай пул гвайдаз,
Ван хьана хьи, кьве йикъалай чан гана,
Вун дуьнядал лагь шумудаз кан хьана?
Лагь вуна заз, илчивилиз атайла,
ЧIулав гада рикIиз мукьвал татайла,
На дидедиз гумир кандач лагьайла,
Дидедвай вун кьисмет тучиз тан хьана,
Вун дуьнядал лагь шумудаз кан хьана?
Инсанрини рахадайбур акваз таб
Масадбурун гафаризни тагуз яб,
Вун акурла жегьиларни жез татаб
Ава лугьур, хабар хиял ван хьана,
Вун дуьнядал лагь шумудаз кан хьана?