Дамахдин уьмуьр

Хизан- хуьруьн пун, бине, ам хвена вилик тухузвай кIарабан, халкьдин пакам йикъаз физвай рекьин экв, къенин югъ къалурзавай айна я. Ам гьикьван къени ва михьи хьайитIа халкьдин пакам югъни гьакI жеда. Гьавиляй чи халкьдихъ хизан туькIуьрдайла иридра алцумна садра атIудай адетарни ава. Це лугьунлай кьил кутуна мехъеррал агакьдалди вишералди мукьва-кьилийри, ярар-дустари шагьидвалзавай хизан туькIуьрунун процесс яргъал ва заланди я. Ам хуьн ва къенидакваз кьиле тухун адалайни заланди я.
Къенин чи ихтилат и кардин вягьтедай экуь чинив атанвай хьиливи Фекьийрикай тир Аскеров Аскер халудинни ва КIаркIаррикай тир Гуьлбесер халадин чIехи хзандикай я.
Аскер халу 1925-йисуз Хьила дидедиз хьанва. Жегьил чIавара Бакуда Агъа Няметулладихъ галаз нафтIадин мяденра кIвалахнава, гуьгъунай Хрушован гишин чIавара Хьилиз хтана эвел чатухъанвална, ахпа рукарин идарада мастер кIвалахна хизан хвенва. Уьмуьрдин юлдаш Гуьлбесер халадихъ галаз санал ругуд хвани (Загьид, Азад, Муьрвет, Къуьввет, Шагьид, Сервет) кьве руш (Ирада, Замира) чIехи авуна кIелиз гана хизанар туькIуьрнава.
Къенин юкъуз къанни цIудаз мукьва хтулрин, штулрин иеси тир Аскер халуди уьмуьрдин юлдаш Гуьлбесерни галаз Хьиларин вини мегьледа уьмуьрзава. Аялрикай Замирани Муьрвет ватанда, амайбурни вири Урусатда жезва. Гатуз чIехи хизан вири санал агатда ва чпин уртах крарни кьилиз санал кьилиз акъудда.
ЧIехи гъуцар абруз куьмек хьурай!

«Алам»

Добавить комментарий

Ваш адрес email не будет опубликован.