В. А. Ашурбековаз бахшзава
Къе сувар я гатфарин-
Яран сувар я,
ЦIийивал гвай цIаярин
Масан сувар я.
Акъудзава палдумар
Гьар кIвалин патав,
Кузва цIаяр, физ гумар,
Экуь ийиз цав.

Тикрарбенд:

Дегь заманрай атанвай
Манидив чил ацIанва:
Им чи Яран сувар я,
ЦIун мецер чи лувар я!
Шарни пепе- гьуьлуьхъди,
Мални девлет- кIвалихъди!
Цав- чил, экъечI чиладай,
Гуьгьуьл, экъечI чиладай!
Атуй чилел цIийивал,
Гатфар, бахтар, михьивал,
Меслегьатни ислягьвал,
Аваданвал, гумрагьвал!
Чиркинвилер курай цIу,
Чаз берекат гурай цIу!
Эквер, экъечI чиладай,
РикIер, экъечI чиладай!

Майданрални пелерал —
Шадвилин къивер,
Вири лезги чилерал —
Садвилин эвер.
ЦIаярилай хкадриз,
Акатиз лувар,
Ава гьар сад, мурадриз
Ахъа жез цавар.

Виш йисарин деринра
Тахьай вич иски
Яран сувар виринра
Хьурай мад экуь!
Вири михьи мурадар
Акъатрай кьилиз,
Хайи чилин къуватар
Хуьн патал цIийиз!

Арбен Къардаш

22.03.2016
Къведай Яран суваралди и шиирдиз дигай макьам туькIуьрайдаз ва а мани лагьай манидардиз “Арси” фирмади кутугай премия гузва.