Шерифова (Рустамова) Муминат Иминулаховна. Родилась 3 марта 1994 г в с.Ашагастал-Казмаляр Сулейман-Стальского района. В 2000-2011 г учёба в Ашагастал-Казмалярской СОШ. после окончания школы поступила на фикультет психологии и философии при Дагестанском Государственном Университете. В 2015 году получила диплом специалиста- бакалавра. На данный момент проживает в г. Сургут.
«Диде»
Вуч фад диде, ви жегьилвал алатна,
Рехи чIарар акъатзава пелез ви.
Куьз вав акьван четинвилер агатна
Ваз секинвал акунатIа чилел и?
Дамахариз къекъведайла таяр ви,
Ваз акурди вал ацалтай зегьмет я.
Гьикьван залан хьайитIани гьалар ви,
На лугьудай:»Вучда бала, кьисмет я».
На зун патал чIугур, диде, азият,
Маса гуз жеч дуьнядавай девлетрихъ.
За пак хуьда чи алакъа-авсият,
Вун зи инсан, къени къилих-хесетрин.
Кесибвили гзаф гана ваз тади,
Анжах дарвал на вуч ятIа чирнач заз.
Гъилер вахтсуз хьанатIани ви векъи,
Абурулай назик гъилер чидач заз.
Арабир зун суалри гьакI батмишзава,
Гъизва абру кудай накъвар вилерал.
Са суалди зал кудай яд илиxзава:
«Вун тахьайтIа зун гьикI къекъвен чилерал!?»
«Лекьериз»
Шумуд тяфе и чилерал алатIан,
Сагъ хьурай куьн! РикIер гужлу Лезгияр!
И дуьнядин куьн гьи пипIе аватIан,
Саламат хьуй зи миллетдин жегьилар!
Зи Лезгияр! МуьтIуьгъ тахьай лекьер лигим!
Куь арада гьат тавурай хаинвал!
Зи Лезгияр! Ватан кани хьелер йигин!
Кими тахьуй Лезги чилел секинвал!
Чи жаванар викIегьвилин гуьзгуь я,
Гапурди хьиз гафаралди атIуда.
Абур патал вири рекьер гьяркьуь я,
Гележегдиз уьтквем камар къачуда..
Галайвиляй далудихъ дагълар хьиз кьакьан,
Чи стхаяр! Гьулданар хьиз дурумлу,
Намус михьи, рикI секин я гьар вахан,
Чав агуддач са ниятни тав чIуру.
Чун са чилин, са ватандин кьегьалар,
Хайи муг я чаз виридаз Лезгистан!
Чун са иви, са «дидедин» аялар,
Играмияр! ша чун чна мягькем кьан!
Чи мурадар, умудар чи садзамай кьван,
Чап килигиз садавайни чаз жедач.
Чи районар капIал хьана вадзамай кьван,
Душманди кам лезги чилел вегьедач!
Шумуд тяфе и чилерал алатIан,
Сагъ хьурай куьн! РикIер гужлу Лезгияр!
И дуьнядин куьн гьи пипIе аватIан,
Саламат хьуй зи миллетдин жегьилар!
Зун гъурбатдиз акъатна..
Дидедихъ хьиз зун хьанва вахъ тамарзу,
Хайи Ватан, зун гъурбатдиз акъатна.
Захъ амач ви цавар вили, чIур къацу,
Чими ракъар къай- аяздик акатна.
АкуртIани агъзур уьлкве вилериз,
Зун хайи муг, ви къимет заз кьакьан я.
Дарман кватIа яраб а зи чилерик,
Куьз лагьайтIа зун Ватанда кIубан я.
Зун сегьеррихъ вин экуьнин гъарикь я,
КIекеривди ачух жезвай датIана!
Зун гъетеррихъ акьван мукьвал дарих я,
Нурар гузвай цавун аршда акIана…
Зи чандава залум тир цIай, тIал ифин,
Са бязибуру маса гузва Ватан квехъ?!
Заз багьа я гьар са къалгъан зи чилин,
Гьар са дагьар, гьар са дере, гьар са рехъ!
Зун мукьварив ви патав мад хкведа,
Зун чIалах я, алатдач мад зи рекьер.
Мублагьвилер авай кьван чи Куьреда,
Квадар мийир, серф ийимир, чан Лекьер!