Шаир Эйвазан лирлияр

Чка амач, ацIана рикI, 
Гъил къачуна гъамарилай. 
Къекъвена зун шумуд рикIе 
Хам алатна хамарилай. 

***

За шиирдив вил ахъайна,

Ван тахьайтIа рикI акъвазда.

Дидед баяд ргай чIавуз

Цакар гъилел тик акъвазда.

***

Четин рехъ я гафунин рехъ,

Шаир ятIа, кIвачел кIанда.

АкъатIайтIан шуьруькьуьм гьекь,

Инсандин тIвар вичел кIанда.

***

Ашкъидин тарс яман хьана,

РикI цIрана стIал-стIал.

Гьикьван хъуьтуьл рикI авай захъ

Къван жез ава ккIал-ккIал.

***

Чинал са гаф, къулухъ са гаф,

Ван хьайила алугда зун.

Мез иердан рикI акурла

Гъил ченедик кумукьда зун.

***

Жуван вацIа кек виниза,

Яд амачтIан , акадармир.

Масдан чанцел атIана кIус

Жуван кьамал акъадармир.

***

Аллагь на зун, зуракI касдин

Суфрадивай яргъа ая.

Эгер закай жез аватIа

Гьалал лукIраз арха ая.

***

Рагъ акьазвай къакъан синел,

Лекь ацукьна вичин муквал.

Жуванда кIвач ял тавуртIа,

КIвал эцигдай Шагьдин кукIвал.

***

Керемрикай садни зун я,

КIанивилин пIир хьанавай.

Баядри рикI кьезиларда,

Жувазни кваз сир хьанава.

***

Зун цIарарин хцивал хьиз,

Вун лирлийрин верцIивал я.

Сад авачтIа муькуьд тахьуй,

Чун ашкъидин чIехивал я.

 

КIанивилел атай зари,

Иман жагъай дили хьиз я.

Булахдин рехъ вилив хуьр кьван,

Зун ятарин пIили хьиз я.

***

Зун Мажнуназ чешне хьана,

Сабур хьана фугъарадиз.

Лейли жузаз атанавай

Зи ахвариз мукьвара хьиз.

***

Мад уьмуьр кIанз арза гана,

Ашкъидикай кхьиз кIан яз.

Эгер къелем хчуз хьайтIа ,

И чилелай хъфиз кIан яз.

***

Юзурайла цилци вандай

Чипир ичер илигна за.

Зулун циф хьиз ацIанавай

Хару вилиз килигна за.

***

РикIе ашкъид гьава гьатна

ЦIигел-цIигел ягъаз авай.

Вуч лугьуда чIал течирди,

Зи гъавурда такьаз авай.

***

РикIел ашкъид куьлег алай,

Вуна зи гьал кьатIанани?

Гьич тахьайтIа садра килиг

Вун цаварай атанани?

***

Рагъ дидедал хъфиз авай

Шалбуз дагъда акIун патал.

Заз секин йиф хуьквез авай

Вун зи рикIиз хкун патал.

***

Харувилер ийимир заз,

Ченгидикай мах ахъайиз.

Яргъарилай кузва на зун,

Ялав галай агь ахъайиз.

***

Зун чинеба рахадай туш,

Зи цIарарал ван алайда.

И ашкъидин кар гала яр ,

Зи гафарал чан алайда.

***

Зул атана кана цуьквер,

Са цуьк ама рикIин сала.

РикI ашкъидин ким хьурай ваз,

КIанивилив девран гьала.

 

Бахтуникай арза гумир,

Шаирдин рикI чIехиди я.

КIусни рехне жагъидач ваз,

Зун ашкъида михьиди я.

***

Ваз ахъайна рикIин варар,

Ана масад тадай туш яр.

Дидед чIалал лирли лугьур,

За ви хатур хадай туш яр.

***

Са сефер зи рикIик элкъуьгъ,

Кьибле хьурай, пIир хьурай ваз.

Гафариз ваъ,рикIиз яб це ,

Ашкъи вуч я, чир хьурай ваз.

***

ЦIар элкъуьрна дуьнядилай,

Экуьн цIарцIел акъвазна вун.

РикIин кIвале шагь дамардал,

Шагьвал ийиз авазва вун.

***

Ашкъи нефес, ашкъи гьевес

РикIин кIани хал я, тават.

Чаравили хайи уьмуьр,

Лугьуз тежер тIал я, тават.

***

За гъетерал йиф акъудна,

Гъил цаварив агакьдайвал.

Ракъин патал рикI акъудда,

Экв гун патал алакьдайвал.

***

И мез кьуна ашкъиди пис,

ЛипI жезава, лал жезава.

Вил ахварик цIигел хьана,

Тахьай хьтин гьал жезава.

***

За чарчардик чуьхвена рикI,

Пак авуна пай гуда ваз.

Ви ашкъидал чIалахъ хьана,

Хъуьрез-хъуьрез гьай гуда ваз.

***

РикIе чIехи цIай авайдаз,

ХъуьтIерикай душман жедач.

Ярдиз вафа авай шаир,

Са чIавузни пашман жедач.

***

Кам мугъаят вегьизва за,

КIвачикай чил хкатзава.

Агакь тийиз кIанидав гъил,

Зи рикIин кьил акъатзава.

Добавить комментарий

Ваш e-mail не будет опубликован.