Рахазва Баку!

Артух 20 йис я, Азербайжандин радио лезги чIалални рахазва

И гаф вири дуьнядиз сифте яз чкIай йикъалай саки 20 йис ваъ, 20 варз алатнава. Сад лагьай сефер 1993 лагьай  йисан январдин 18-аз и гаф лугьун  патал микрофондив агатайди Гуьлбагьар Айдунбекова хьана. Са йис алатайдалай ахпа зунни и редакциядиз диктор яз кIвалахал атана. Чи а чIаван чIехи редактор зари Келентер Келентерли ва редактор Жалал Жалалов тир. Гнуг гьафтеда кьведра — 15 декьикьа яз эфирдиз акъатзавай. Идаз килиг тавуна чахъ яб акалзавайбурин  сан гзаф тир. Куьн чIалах жеч, а йисара Азербайжан “Девлетдин” Радиодин почтуниз хквезавай  чарарин пара паюнин винел «Лезги редакциядиз» кхьенавай. Вучиз лагьайтIа, им Азербайжанда авай лезгийрин тарихда сад лагьай вакъиа тир ва абру и чарара чпин меслятривди, тIалабривди чаз чи кар кьилиз акъудиз куьмек гузвай.

Сад  лагьай  йикъалай  чи вилик  акъатнавай  са  проблем  материалрин  фонд  кIватIун  тир. Радиодин  фонотекада алатай  виш  йисан 60 лагьай йисара лентиниз къачунавай  муьжуьд  макьамдилай  гъейри са затIни  авачир. Са  гафни  авачиз, яб  акалзавайдан  гуьгьуьл  кьан, гнугрин  рейтинг  хкажун  паталди музыка хикягъун тематик материалрилай  тIимил файда квайди туш. Профессионал  гьавада студияда  кхьенвай ва эфирдиз лайихтир музыкаяр чахъ авачир. А  четин чIавара зун КцIариз хъфена, ина авай ансамблрин регьберривай лезги манияр кхьенвай касетар кIватIна. Чи куьмекдиз къе тIвар вирида икрамдивди кьазвай композитор Фетуллагь Регьимхановни  агакьна. А рагьмет хьайиди  чи  редакциядиз вичи  туькуьрна лентиниз кхьенвай 13 манини гваз атанай. Гуьгъуьнай  чи  редакциядихъ галаз  чими  авсиятар хуьзавай С. Керимовади «Сувар» ансамблдин сад лагьай диск ва пешекар композитор Мегьамед Гьуьсейнован манирикай туькIуьрнавай лентер чав агакьарнай.
Чи радиодин редакторвал  хиве гьатнавай  Жалал  Жалалова гьазурзавай хабарри ва очеркри, кьилин редактор хьайи Келентер Келентерлидин чи тарихдикай, литературадикай, ацукьун-къарагъунрикай, каркам, рехи ва сейли ксарин уьмуьрдин рекъерикай, гьак
Iни абуру тунвай гелерикай гьазурзавай радио макъалайри лезги гнугар виридалай пара яб акалзавай гнугдиз элкъуьрнавай. Чи экуьбру, хайи чIалал рикI алай ватанперестри чипелай алакьдайвал радиодин кардихъ къуьн кутазвай.

А йисара чи гнуг гьакI FМ лепейрай (волнайрай), гьакIни «Араз» програмдай эфирдиз  чкIизвай виляй адахъ  виридавай яб акализ  жезвай. Вучиз ятIани эхиримжи ругуд йисиз, чи  гнугар  и  лепейрай  акъудна, ултракуьруь лепейриз вегьенва. Гьавиляйни эхир чIавара чи редакциядин яб акалзавайбурухъ галаз авсиятар къуьруь хьанва.

Чун къенин йикъалди ара датIана гьар гьафтедин ислен ва арбе йикъариз Азербайжандин девлетдин радиодай «Рахазва Баку» гафаралди кьил кутазвай гнугар гваз эфирдиз акъатзава ва умудзава хьи, Бакудай лезги чIалал телегнугар кьиле тухудай югъ яргъада авач.

Руслан ШЕЙДАЕВ

PS. Эхиримжи цIекIуьд йисан къене датIана Азербайжандин лезги радиодай «Рахазва Баку» лугьузвай «Лезги Левитан», гьакIни чи «Алам» журналдин учредител Руслан Шейдаеван алатан йисан ноябрдин 30-аз 55-йис тамам хьанва. И юбилейдин вилик ам Азербайджандин журналистрин кIватIалдин «Къизилдин къелем» мукафатдин лауреатни хьанва. Чна ам редакциядин коллективдин патай рикIин сидкьидай барка ийизва. Адаз чандин сагъвал, рикIин шадвал ва гъиле авай крар кьилиз акъуддай чIав ва такьатар тIалабзава ЧIехи Гъуцаривай.

“АЛАМ”

Добавить комментарий

Ваш адрес email не будет опубликован.