ЦIийи алманах

Са йис винел зегьмет чIугуна арадиз акъудай «Аламдин» алманахдиз экв акуна. Литератур кIва­тIал «Марвар» ва чи журналдихъ галаз авсиятда хьайи пудкъадалай виниз кирамрин эсерар санал кIватIнавай и алманах рехи зари Сажидинан «Куьре Мелик» ва «Гьажи Давуд» шиирралди авалзаватIани, ана са хейли прозадин эсеррини чка кьунва. Гьаким Къурбанан «Зуьгьре гъед» романдикай са чIукI гайидалай кьулухъ, Фейруз Беделахтулан «Тарашхана» комедиядилай ахпа, Нариман Ибрагьимован «Са чими гатуз», Шихжамал Шихметован «Чан алай мийит», Репия Къарибовадин «Пара кан хьайидаз тIимилни хьанач», Юсиф Халилован «Дидедин шикил» гьикаяяр къвезава. Прозадин гуьгъ Ризван Ризва­нован «Шарвилидин мехъер», сегьнедин этюд ва «СтIур Далагь» тарихдин драмади давамзава. ХII-XIII виш йисара уьмуьрай СтIур Далагь эсерда вичин яр Аяран гуьгъуна дуст Арчанни галаз Генжедиз акъатайла, ана девирдин чIехи зари, суфийрин шейх Низамидихъ галаз аквазва. Эсер монгол-татаррихъ галаз СтIура женгиниз гьазур хьанвай халкьдин вилик Далагьа лагьай
Аждагьанар, дэвер къвезва СтIуриз,
Рекьер-муькъвер, кIвалер-никIер чкIуриз!
Манжанахар, дегьреяр гваз зверзава,
Вай-амандив дагъни дере ацIуриз.
РикIяй аман акъуд, эллер, гьазур хьухь
А ягъийрин хура гапур акIуриз.
Далагь фида виридлайни кIвенкIвеваз,
Мугъул-татар чи мулкарай чукуриз!-
гафаралди куьтягь жезва. Чи литературадин тарихда гел тадай и драма са нефесдал кIелиз жезва. Абир ЭчIехвидин «УстIар», Гуьзеля Гьасановадин «Бармак вилериз ават тавурай» гьикаяйралди ва Куругъли Ферзалиеван аллегориядин кьисайралди давам жезвай проза Агъа Новгород шегьердин Девлетдин ЧIаларин Унверситетдин аспирантурада кIелзавай Равиддин Шамилова устадвилелди кхьенвай «Марф» гьикаядалди куьтягь жезва.
Алманахди Сажидиналай кьил кутуна яшар хьанвай Бажиханум Исаева, Пакизат Фатуллаева, Фейзудин Нагъиев, Вакъиф Муьшкуьрви, Фикрет Хидиров, Мегьамед Мегь­манов, Адил Къайибханов, Гуьнеш Мевланов, Гьилал Аскеров, Лезги Бегьлул, Зерифа Кьасумова, Гуьлжагьан Мисриханова, Элдар Ферзалиев, Римма Гьажимурадовадилай авална юкьван яшарин Сейфудин Шагьпазов, Арбен Къардаш, Шагьмардан Агъакишиев, Намик Ферзалиев, Бести Нифтиева, Имран Кичибегов, Билал Адилов, Марям Алискерова, Гуьлалийрин Эйваз, Ашукь Шемшир, Вукъар Идрисов, Халидин Элдаров, Дилмира Ашурбегова, Элмар Саруханов, Анар Уьнуьгъви, Марсел Испикви, Муса Агьмедов, Вадим Адилов, Сархан Ярахмедов ва Мегьамед Ибрагьимов гьакIни, жегьил зарияр — Лале Садирова, Камалдин Илясов, Тачир Аташов, Луиза Ахмедова, Эсмира Бейбутова, Мадина Рамазанова, Владик Батманов, Сулейман Ахцегьви, Гулфия Пиругъланова, Зарина Мустафаева, Элнара Ризванова, Саира Сефербегова, Омар Къазиханов, Раджи Гуьлмиров чинал акъудзава. Алманахда гьатнавай Жалал Багъиращтулан жавабарни галаз ганвай имуча-мучаярни чи литературада кьетIен чка кьадайбур я. Алманахда гьакIни туькIуьрна чапдай акъатдалди чи арадай фейи Медет Арзуманован шиирарни гьатнава…

“АЛАМ”

Добавить комментарий

Ваш адрес email не будет опубликован.