Ч1алан экв гвайди

Зи дуст Абир малимдиз са хъсан гаф ава: «Чна рак гатана ахъай тавурт1а, лагь, чаз рак ахъайнач, ахпа муькуь рак гатут»

Кц1арин културадин к1вале тухуз ихтияр тагай Гуьлалийрин Эйвазан 50-йисан юбилейдиз талукьарнавай мярекат, чна Бакуда, Решид Бегьбудован т1варунихъ галай Девлетдин Манидин Театрда кьиле тухвана. «Раб вегьейт1а аватдай чка авачир» и межлисдикай лагьанвади тир. Са хейли ксар чка тахьана акъатна хъфена. Абурун арада хизанни галаз атанвай Этибар Ст1урвини авай. Мярекат нянин сятдин иридаз Руслан Шейдаеван ванцелди лентиниз къачунвай, шаирдин «Агат хъия» т1вар алай шиирдалди ва а гафариз Маина Абдулмуталибовнади кхьенвай манидиз туьк1уьрнавай видеоклипдалди авална. «Самур» Лезги Милли Меденият Меркездин патай хийир дуа гайи рехи, экуь, ч1ехи кас, профессор Камал Абдуллаеван рахунрилай ахпа сегьнедиз юбиляр акъатна. «Жуван к1вале жув т1амада» хьайи зариди вичин мярекат аярдакваз кьиле тухвана. Юбиляр мубаракун патал сегьнедиз Хачмасдин Лечет хуьре уьмуьриз Махсухуьре малим к1валахзавай Шихжамал Шихметов, Къебеледин Камарван хуьряй атанвай малим, Эйвазан шиирар азербайжан ч1алаз элкъуьрнавай шаир Къериб Гьуьсейнов, «Сувар» ва «Жигитар» ансамбрин регьбер Завир Нежефов, заридин студент ч1аварин дуст, Бакудин Сураханы райондин Ц1ийи Азербайжан Партиядин аппаратдин регьбер Салман Абдулов, заридин шиирар урус ч1алаз элкъуьрзавайди, «Марвар» литератур к1ват1алдин пун кутурбурукай сад тир Бести Нифтиева, Дагъустандин Халкьдин Артист, шира устад Ширбет Рзакъулиев, Магьачкъалада акъатзавай «Лезги газетдин» кьилин редактор, жегьил шаир Мегьамед Ибрагьимов, «Элтуда» т1вацел шира хьанвай репер Элшад Лебибов, Республикада уьмуьрзавай халкьарин ч1алар чирна туп1алагъзавай лингвистикадин ижтимаи тешкилат тир «Уьфуькъдин» лезги ч1алан групдин регьбер Офеля Яхулова, Чпиррин хуьруьн мектебдин, гьак1ни юбилярдин математикадин малим хьанвай Шихверди Агъаев, «Марвар» литератур к1ват1алдин пун кутурбурукай тир зари Вакъиф Муьшкуьрви, Худат шегьердай атанвай экуь, рехи кас Багьрам Залов, Кьвехуьрубадин хуьруьн мектебдин малим Зиядхан Мурадханов, Манкъулидин хуьряй атанвай экуь кас Оруж Оружов акъатна, юбилярдиз чпин рик1ин гафар лагьана. Шира манидар Магьира Шириновади заридин гафариз вичи кхьенвай «Гуьзел», халкьдин макьамдал заридин гафар эцигнавай «Лезги руш», жегьил манидар, Сумгаит шегьердин музыкадин мектебдин студент Гуьрмет Исрафилова заридин гафариз Расим Бакарова кхьенвай «Мурад» т1вар алай манияр тамамарна. «Жигитар» ансамблдин биц1и аялрини Расим Бакарова заридин гафариз кхьена Ашукь Адил Сеферова тамамарзавай «Лезгияр» манидал кьуьлерна. Акьван аяр ва милиз кьиле фейи межлисда чпин рик1ин гафар лугьуз  канзавай, амма сагъламвилин себебар аваз агакьиз тахьанвай ксар Азербайжандин Теле-радио ширкетдин лезги ч1алал радио-гнугрин редактор Руслан Шейдаеван, «Самур» Лезги Милли Меденият Меркездин кьил Имран Рзаеван, шира зарияр Бажиханум Исаевани Зерифа Кьасумовадин паталайни чна юбиляр мад сеферда тебрикзава. Мярект лентиниз къачур операторар Насир, Мурад, Рамикни Хачмас райондай юбилярдин мярекатдик чпин пайни кутун патал атанвай.

Я Дагъустандин, яни Азербайжандин кхьирагрин к1ват1алрик квачир, са уьлквединни дамахдин т1варариз лайих акун тавунвай, са т1или, сая заридин экуьнал, поэзиядихъ яб акалун патал к1ват1 хьанвай халкь кьве сятни зура са нефесда кьиле фейи мярекат куьтягь хьайилани чк1извачир. Абурувай гьелени Эйвазан поэзиядин суьгьуьрдикай хкатиз жезвачир. Ваз мадни ч1ехи агалкьунар, играми жуван халкьдилай гъейри садани лайих чир къимет таганвай, ч1ехи зари!

Камран АЛАМВИ

 

 

Добавить комментарий

Ваш адрес email не будет опубликован.