Гуьмбет хьиз хтана

Мегьман Гьажибаладин хва Абдуллаев 1894- йисуз КцIар райондин ЭчIехуьре дидедиз хьана. ЦIийи мектебар эцигунихъ вичин чIехи пай кутур, асулдай педагог тир Мегьман муаллим 1937- йисуз «халкьдин душман» хьтин чIана тIагъма алкIурна, дустагъда тунай. Ам ватандилай пара яргъал чкайриз акъатнай. М. Абдуллаев 1942-йисуз яргъал Урусатдин Архангельск вилаятда рагьметдиз фена. А чIавалай гзаф вахтар алатна, амма… Эхь, ам эхир 76 йисалай кьулукь хайи хуьруьз, вичин веледрин ва хуьруьнвийрин  гуьруьшдиз гьуьмбет хьана хтана.
Майдин 25-даз ЭчIехуьре чIехи гъалабалух авай. И гатфарин иер береда, дигай тIебиатдин хурал алай и макандиз къвезвай мугьманрин сан-гьисаб авачир. Хуьруьн мектебдин гьаят инсанхъривди ацIанвай. Къе хуьруьнвияр аламатдин кардин шагьид тир. Мегьман Абдуллаев “хтанвай”. Гьар аямдиз вичин гьукм жеда. Са береда гъилер далудал, рикI-иман хзандив ва тарс гузвай аялрив гваз, кьулухъ вил ягъаз-ягъаз кьуна дустагъ хьиз хуьрей фейи Мегьман Абдуллаеваз къе ЭчIехуьре  гьуьмбет ахъаюниз талукь мярекат кьиле физва. Эхь, чилин ирид паюнилай са пай кьазвай гьукуматдин туькьуьл политикадин «чIулав 37-лагьай гад» и хуьруьзни атанай.

ЦIийиз эцигнавай мектебдин гъенел чIехи мярекат кьиле фена. Райондин крар кьилиз акъуддай гьукуматдин I лагьай заместител Элиф Мамедова мярекат сифте гафуналди ахъайна, алай аямда уьлкведа, гьакIни районда кьиле физвай чIехи туькIуьрунрикай, физвай аваданвилин процесрикай рахана. Мегьман муаллимдин рухваяр Дагъустандин Халкьдин артист, 

Искусствойрин лайихлу деятель, тIвар-ван авай шаир, композитор ва драматург Асеф Мегьмана, дуьнядин са шумуд Илимрин Академиярин член, Азербайжан республикадин «Шуьгьрет» ордендиз лайих акунвай алим Камал Абдуллаева, Дагъустан-Азербайжан Дуствилин Обшествадин президент Абдулкъафар  Агьмедова, райондин културадин отделдин чIехиди  Давуд Ибрамхалилова, генерал-лейтенант Яшар Айдемирова, хуьруьн гьукуматдин векил Къазихан Селимханова, шаир, «Алам» журналдин къене кардихъ галай «Марвар» литературадин кIватIалдин регьбер Эйваз Гуьлалиева ва масабуру мярекатдал гаф лагьана, чпин фикирар ачухарна. Гьуьмбетдин лент Асеф Мегьманан мурад яз, бубадин чин такур гъвечIи хва академик Камал Абдуллаева ахъайна. Мектебдин аялри шиирар кIелна. Мярекат  гуьгъуьнай мектебдин цIийи дараматдин иер, чIехи залда суфрадин къерехда давам хьана. 

«АЛАМ»

Добавить комментарий

Ваш адрес email не будет опубликован.