Цlийи филм чlугвазва

Мукьвара чи ватанэгьли, актер ва режиссер, Ашукь Алиханан филмдиз экрандин чин аквада

Алихан Мегьамедрагьимов (ЛЕЗГИ ИВИ) алай аямдин тlвар-ван авай ашукь яз лезги элдиз сейли я. Лагьана канда, ам вичин алакьунралди тек са ашукьвилин жигьетдай ваъ, гьакlни харусенятдин маса хилерайни халкьдин дережа, нуфуз виниз хкажиз алахъзавай ватанперес кас я. Къе ам чаз ашукь хьиз, режиссер хьиз, актер хьиз чизва. Ашукь, актер хьиз вичихъ алакьунар авайди успатнавай устадди чуьнгуьр галаз тамамарзавай ватанпересвилин манияр вири элди хушдиз кьабулзава. Ихьтин кьетlенвилер квай пешекардал ЛЕЗГИ ИВИ тахаллус хьунни дуьшуьшдин кар бажагьат я. Вилик эцигнавай къастар кьилиз акъудун патал ам датlана гьерекатдик ква.

Алихан Османович Мегьамедрагьимов 1976-йисан 29-апрелдиз Докъузпара магьалдин Авадан хуьре ашукьдин хизанда дидедиз хьана. Гьеле аял чlавалай ам чуьнгуьрдал, далдамдал къугъваз хьана. Харусенятдин ашукьвилин рекьяй адаз гъвечlи бередилай вичин буба ашукь Мичегь Османа чирвилер гана. Тlвар-ван авай ашукь Османа Авадан хуьре «Ашукьрин кlвал» медениятдин макан кардик кутуналди аниз регьбервални гузва. Алихан Мегьамедрагьимова хайи хуьруьн мектебдилай гуьгъуьниз ДГУ-дин актерар гьазурзавай медениятдин факультет агалкьунралди куьтягьна. И рекьяй мадни дерин чирвилерихъ ялзавай жегьилди энгелвал тавуна, Москвада кардик квай Б.Щукинан тlварунихъ галай Театдин институтда режиссервилин пешедайни кlелун давамарна. Ина адаз бажарагъ авай режиссер М.Борисова чирвилер гана. Вичи кlелдай чlавуз институтдиз ректорвал авур тlвар-ван авай актер, артист Владимир Этушахъ галазни Алиханаз хъсан авсиятар арадал атана. «Харусенят — им заз тlебиатдин патай атанвай, датlана зи руьгьдин дережа хуррамзавай, кlубанарзавай савкьат я» — лугьузва ашукь Алихана. 

Ингье и мукьвара чав са цlийи хабар агакьна. Саки пуд варз кьван вахт я, Белоруссиядин къадим шегьеррикай тир Могилевда режиссер Вячеслав Сикорадин «Гъвечlи ватан» («Малая родина») тlвар алай кино чlугунин кlвалахар кьиле физва. Хвешивилелди къейдна канзавайди ам я хьи, чlугвазвай и фильмдин кьвед лагьай режиссер, продюсер ва кьилин ролрикай сада къугъвазвайди чи ватанэгьли Алихан Мегьамедрагьимов я. Рикlел хкин, икьван чlавалди ам «Меч», «Глухарь», «Крупный мафиоз» ва маса кинойрин эпизодра къугъванай. 

И йикъара актердихъ галаз жузун-качузунардай мумкинвал хьана заз. Чи арада кьиле фейи ихтилатни цlийиз чlугвазвай кинодикай хьана. 

— Алихан стха, чlугвазвай цlийи фильмдикай ихтилат ая. Ам жанрдин жигьетдай гьихьтинди я?

— Комедия я. Санлай къугъвазвайбурун кьадар 30 кьван кас я. Ибурукай 5 актер кьилин ролра къугъвазва, гьабурукай садни зун я. Вячеслав Сикорани зун кьведни кинодин режиссерар я. Ам — режиссер ва сценаридин кирам, зун кьвед лагьай режиссер ва продюсер я. Са гафуналди, чи кьведан кlвалах я. Къейд ийин, и кино зи харжийралди туькlуьрзавайди я. 

— Кинодин винел тухузвай кlвалахар мус акьалтlда ва ам экранрал акъатда ?

— Эгечlун июлдин сифте кьилера авурди я. Сентябрдин вацра акьалтlардай фикир ава. Кинойрал рикl алайбуруз мукьвара са сятни зура давам жедай «Гъвечlи ватан» тlвар алай цlийи кино аквада.

— Вахъ гьар са камуна чlехи агалкьунар хьурай! 

Куругъли ФЕРЗАЛИЕВ

Добавить комментарий

Ваш адрес email не будет опубликован. Обязательные поля помечены *