Рагъ аватна вилериз зи, 
Ваз акI хьана вил авур хьиз. 
Гъиле ифин гьатнава зи, 
Яр ви гъиле гъил акьур хьиз. 

***

Ашкъидин цIал ифирда рикI, 
Канивал чаз дастан жеда. 
На рикIин вар ахъаз тур яр, 
Зун эбеди мугьман жеда.

***

Зи рикI ашкъид чешме я яр,

Са цIиб къачу яд хьурай ваз.

ПIуз илисна са хурпI ая,

Земземдин ци дад гурай ваз.

 

***

Вун такуна кьунава мез,

Гаф жез амач чIун галачиз.

Чан каниди ,амай уьмуьр

Герек туш заз вун галачиз.

***

Дагъдин хурай рехъ атIана

Зун кукIушрив агатнава.

Къурбан тирда рикI атIана

Зун ярдивай къакъатнава

***

Булахар ваъ, чан каниди

И тандавай рикI акъвазна.

Зазни чидач вун такуна

Икьван чIавуз гьикI акъвазна

***

Азрайил вун рехъди алат,

Я тахьайтIа къван гудани?

Кани ярдин чин такунмаз

Гьикьван регьят чан гудани?

***

Ваз пих акван рикIел хьанвай,

Пифиннава яд алахьиз.

Хуквез жезвач ярдин патав,

Паласадин гад акахьиз

***

Я марвардин цIуьк хьтин яр,

Зун ви рикIел аламани?

Сят квадарна, къайгъу авач

ТупIал тупIук галамани?

ГьикI фида кьван чIуькь тавуна,

Рекьел яр вун тек алатIа?

Таза кел хьиз заз килигиз,

Виле ашкъид экв аватIа.

***

Я руш, вавай цуьк канзавач,

На са верцIи лирли лагь заз.

ТупIалагъа рикIин дафтар,

Гъариб тамир акваз-акваз

***

Цуькведи чаз цуьк гузава,

Хайи чилин хатур галай.

Я руш за ваз рикI гузава,

Канивилин атир галай.

***

Бейхабардиз хуькведа зун,

Таможнада акIанава.

На симерай ван акъуда,

Яр зи рикIни ацIанава.

***

Таза тупIар вергед куда,

Минет я ваз афарармир.

Экуьн-экуьн булахдал ша,

Я руш на заз тапарармир.

***

Дили рикIин дараматда,

Ялав туна хъифена яр

Ви чIурнавай пел акуна,

ГьикI акъвазда текьена я

***

Вазни гуда вах лагьай руш,

Зи нубатдин китабрикай.

Чир жедайвал ашукьбурун,

РикIе авай азабрикай.

***

Канивилин тIал верцIи я,

Кьил къекъвена,экъвез ама.

Заз винелай, эхь лагьана,

Зи рикI гьеле кьечIез ама.

***

Чан гафунихъ цIигел чандин,

Аста -аста чан акъудна.

Чан хчункай багьна кьуна,

Ярди гъилер зав агудна.

На гьакI рикIяй эвера яр,

Зи патавай гьай гуда ваз.

Цаву туртIа и мукьвара,

Къизилдин цеп пай гуда ваз. 

***

Заз тахьайтIа шеда лагьай,

Зи уьмуьрдиз къведа лагьай,

Икьван хъсан яр жедани,

Кьведни санал жеда лагьай.

***

Вун галачиз гатфар аван?

Яр яргъавай фагъир я зун.

Ви ашкъидиз муьтIуьгъ хьана,

Кабаб хьайи шаир я зун.

***

Икьван пара чан лагьана,

Зун вал пара вердишармир.

Атана фей дуьня лугьуз,

Зун масадав дигишармир.

***

За чардах ваъ, кIвал эцегда,

Дуьня рикI хьиз ген хьурай чаз.

Ваз яйлух ваъ тупIал гъида,

РикI ашкъидин гъен хьурай чаз.

***

Муьгьуьбатди галтадарна,

РикIе ашкъид звал хьана яр.

Заз тек са вун кан я лугьуз,

Къуншид рушар къал хьана яр.

***

Агъзур нехиш гана чилиз,

Марвар цуьквер аламат я.

Вун галачиз физвай уьмуьр,

Заз рикIин кIус, къазамат я.

***

Зурзалаг хьиз гьахьна рикIе,

Галтад жезма и тан гьеле.

Вилин кири агь хьана хьи,

КIевиз кьунва зи чан гъиле.

***

Агъзур тават цIиргъина хьуй,

Яр тек са ви тIвар кьада за.

Мад дуьнядиз хуьквез хьайтIа,

Тек са вакай яр кьада за.