Са поэзиядин мярекатда чи Левитан, Бакуда авай лезги радиодин кьилин редактор Руслан Шейдаева завай жузунай: — «Сифте шиир гьида кхьена, сифте шаир вуж я?»
Къуру накьвадал и иер дуьня туьк1уьрай сифте ч1угвар Аллагь я, сифте шиир лайла я, сифте шаирни Диде.
Шаирдин вар, шиирдин рак гатайдаз,
Зи т1алдин т1ал, къвез авай свар кьат1айдаз,
Рик1 ахъайна, пел ахъайна атайдаз
Ша лагьана, хъуьрез-хъуьрез куьк1вена.
Руьгь Ракъинин нефесдикай алугна
Цавун чина лепе гьатна галукьна.
Лекьрен рик1е, селдин меце амукьна
Шумуд сефер зун марфари чуьхвена.
Циз темен гуз, цуьквед кьурла вац1ун кьер
Масад хьана кхьинрин звер, гафун звер.
Хуьз алахъна мецел шиир, сивел хъвер
Иервилик жуван гъенел къекъвена.
Рик1 ич1ириз Шагь кьван авай гин ава
Ч1ур тийир гаф, авур туба, кьин ава.
Хайи чилиз салам гудай чин ава
И т1амбурда, хуьз авай зун текьена.
Шаирдин ким кук1уш, дугун, тала я
Ст1ал цавун, ст1ал кьвалан бала я.
Гаф лайладин, Эйваз ч1алан бала я
Уьмуьр физва, элдин рик1е рек1вена.
Гьак1ан хьанач вун
На заз ваъ лагьайт1а, «гьак1ан» жеда вун
Мад ц1арни кхьидач за ви т1вар кьуна.
Чидач, гьи жуьреда рик1ел хуьда вун?
Бес вучиз за жуван хеве пар туна?…
…Гьикьван кьинер гана, «гьак1ан» хьанач вун
И рик1ин зуз авай пип1е амукьна.
Гум къенез ягъана, залан хьана кун
Чинеба жув-жуван гине алугна.
Рик1елай алатна, рик1яй акъудин…
Алк1ана дамардин цлал алама.
Вил амукьин яни, туш хъел хкудин…
Вун вучиз канидан къвалал алама?
Ви рик1из гьахьнат1ан, акъвазиз хьанач
Аллагьди чи рекьер, гьа ик1 кхьена.
Я дуьня чк1анач, я цав алугнач
Мад вучда чи эквер, гьа ик1 кук1вена.
Шукур хьуй на акьван, пелеш тунач зун
Къведайдаз рехъ туна, акъатна яргъаз.
Гьавиляй за рик1е экъуьрзама вун…
Т1алдиз кьил агъузна, акъвазнач Эйваз.
Аллагь, икьван ч1ана макьам жедани?
«Гъавурда михьиз, вири акьазва, рахаз жезвач…»
И гафар гатуз лапни пара ван къведа…
Ак1 хьанай, шиирди cагъарда дердер,
Са п1ип1ни юзанач сел я кьван зи рик1.
Элдин канивал я, заз авай сенгер
Курук1дал къал алай, хел я кьван зи рик1.
Чк1ул хьиз къуьруь я, хартини тухвай,
Чидач гьи мезгьебдив агатнава чун.
Ник1и эч1ел гъизва куьтенди чухвай…
Гьикьван «ваъ» лагьайт1ан, къакъатнава чун.
Къакъатун вуч ят1а, чиз авачирди
Араздал са йифна Самурдал хтуй.
Хиялдиз вичин пун гъиз амачирди
Шиирдиз илифна абурдал хтуй.
Гьинава, гьикьван я- вучиз чиз амач?
Накьни къе течирдаз, пакам жедани?
«Гъавурда акьазва, рахаз чиз авач»-
Аллагь, икьван ч1ана макьам жедани?
Чун вацрай атай туш, чазни накь ава
Куьч хьана хъфизвач, пакам туьк1уьрин.
Вил вегьин рик1ериз белки такь ама
Рекьера экв хьурай, чирагъ куьк1уьрин.
Жував агата
Шаир, Кьулан вац1ун ванциз элкъвена
Руьгьдиз чан-рик1 ая, ч1алаз салам це.
Эл фидай рекьеллай къванциз элкъвена
Кук1ушдиз салам це, кьвалаз салам це.
Вун жував агата, жувавай кан хьухь
Ви рвек1-рвек1 акурда гич1и талгьурай.
Ц1арара эвер хьухь, манида ван хьухь
Гелевай лупайри пич1и талгьурай.
Гьар къамбут акьурла, йифер акъудмир
Мич1ерин дегьнеда рехъ алатайт1ан.
На руьгьдин цаварив цифер агудмир
Цаз алай уламрал кек алатайт1ан.
Шиирдив эцига къванцин винел къван
Байихрин экв акьур т1ал секин хьурай.
Нефес кьван кан хьурай, инсандиз инсан
Ви ванцин лайладив къал секин хьурай.
Вун жував агата, на рик1 михьиз хуьх
Гьар са шеъ ивидай, гаф рик1яй къведа.
На чешме михьиз хуьх, на рехъ к1евиз хуьх
Кьилихриз дурувал саф рик1яй къведа.
***
Чидач гьинай атанат1а ихьтин сабур:- «хьана,… фена»
-Куьз ахъайна дидедин гъил? Гъилин жаваб:- «хана,…фена»
Дагъдин юкьни кьве къат жеда, эх тахьана ихьтин зенгер:-
Вирус ава, фад кучуда, варар к1ева :- «кьена…, фена…»
Ч1алахъ жезвач акахьна кьил, амачирдал Диде к1вале
Т1алдин гъиляй хъвайи шербет, агъу хьиз тир:- «кана,…фена…»
700 югъ ахвар хьиз я, рекье твазвай гьар са легьзе
Зун гъвел хьана т1ални деве, галукьай цал:- «ц1вена, …фена.»
Къиямат къуз жузун ава:- «Дидед хатур,… чан аламаз…?»
Шаир Эйваз пионер я, жаваб гуда:- «хвена,…фена.»
Рик1из ваъ лагьана, къене таз жедач
(Кваг ахъайиз, кваг храна
Сим ршана, ракь храна.
Ч1алан виле йиф акъудиз
Дам арушиз рик1 храна.
Рик1ин винелай)
И рик1яй дуьнядиз рехъ авай чка
Зи лезги мягьле я, лезги шиир я:-
Байихрин дегьнеда, хиялрин муква
Юза хьун суьгьуьр я, рахун суьгьуьр я.
Зунни ч1ал са алем, зунни т1ал са гаф
Уьмуьрдин гъил кьуна, пелел кхьенвай.
Зи руьгь канивал я, агудна кьве хаф
Са кьакьан къавахдин хелел кхьенвай.
Шиирдин к1вачин ван, к1евиз атайла
Йифекай къакъатна ахвар чуьхуьда.
Азраил зун лугьуз, к1вализ атайла
Ц1арц1е рехъ алатна, ич1из хъфида.
Зи дуьня, дуьня я к1еви тучир рак…
Атайдаз экв гана, рик1е рик1 тада.
Кьилиз яб тагайт1а акатда тарак…
Рик1из ваъ лагьана, къене гьик1 тада?
Гафуниз гаф къведач, чандикай ккана
Кьилелай ц1верек1 хьиз элкъвез хьайит1а.
Лугьуда, шаирдин бахтуни гъана
Ч1алак элдин меце къекъвез хьайит1а.
Зи дуьняди эхна зун
( ЧИН хуьх, инсанар!)
Къе шиирди кхьена
Са суьгьуьрди шехьна зун.
Кьве дуьняди чуькьвена…
Зи дуьняди эхна зун.
Ахвар ханвай агьди хьиз
Рик1 ц1арари к1елзама.
Гагь чан-рик1из, гагь кк1из
Къаяб-каяб гъвелзама.
Залай а пад кьат1унриз
Лепе хьана, гьуьл хьана.
Каф ацукьна ятарин…
Мад ац1айди вил хьана.
Къен эвягъна йиферин
Ц1вал храна ц1аяркай.
К1елдайди гьик1 хкудин
За Ракъинин паяркай!?
Цавун ахъа варарал
Рик1 илисна, квал кьена…
Т1алдиз тимтал хкажнач
За лайладин ч1ал хвена.
Ц1айлапанри зил кьуна
Гъил кьадайди амачир
Шумуд т1алдин гъил кьуна.
Тахт акъатна цаварал…
Ватан лугьуз, чил кьуна.
Хиял йифен къуш хьана,
Рехъ шиирдал туьш хьана.
Руьгьдиз сувар хуш хьана
Рик1 секинриз гьуьл кьуна.
Лув ц1елхемрик галукьна,
Акьур къванер алугна…
Байихра т1ал амукьна
Мукьвал-мукьвал кьил кьуна.
Гафун виле экв хвена,
Ккурум-ккурум гьехъ фена,
Ат1уз- ат1уз рехъ фена
Дугул вегьей цил кьуна.
Гаф хьун, руьгьдал хккат1на
Зун шиирдив агатна.
Элдин кимел акъатна
Ц1айлапанри зил кьуна
Гафуни хуьзва зун, кхьирай лугьуз
Ц1арари дуьнядиз ц1ийиз гъизва зун
Килигиз чирзава, чириз чирзава.
Легьзедиз шукур гъиз вилик физва зун
Къаябра ц1ирзава, ц1ириз чирзава.
Шиирдин къвалалай гар алатна къе
Рик1ин рвех элкъвена, нав регъвена за.
Зи гъил агакьдалди ц1ар алатна къе
Цавун галтад хьуна, ч1ав регъвена за.
Ч1алан экв ц1арарик аруш хьана мад
Рик1ериз илифна, ифирай лугьуз.
Ялзава гьар санихъ, алт1уш хьана мад
Гафуни хуьзва зун, кхьирай лугьуз.
Шиирди дуьнядиз гуж къалурнава
Гьавиляй зурак1бур сук1рада жеда.
Аллагьди гьар садаз рехъ къалурзава
Ажузбур дат1ана къакърада жеда.
Чидач эх авурбур, негьиз жедат1а?!
Рик1е ц1ук1, къене ц1ай хуьз алахъна зун.
Икьван тахайвилер эхиз жедат1а?!…
Куь кимел къе Эйваз гъиз алахъна зун.
Элдив вахкана
Шиирдив уьмуьрун, пай атана заз
Селдивай къачуна, элдив вахкана.
Зи руьгьдин дегьнедай гьай атана заз
Элдивай къачуна селдив вахкана.
Рик1ел кьац1 тавуна кьезил жедач хъел
Вилел гел т1ат1ана, т1имил жедач шел.
Тараз т1ар тавуна, агъузна за хел
Чилелай къахчуна хелев вахкана.
Лекьрен муг кук1ушра, кьвала хъсан я
Фарлашни рекьел ваъ, цла хъсан я.
Дуьани шиирда, ч1ала хъсан я
Мецерлай къачуна мелев вахкана.
Яшдал яш атунвай эхиз чир хьана,
Вуч ч1ана дуьшуьш я…негьиз чир хьана.
Рекье тваз чир хьана, шехьиз чир хьана
Ц1велай къахчуна шелдив вахкана.
Рик1ин хъуьтуьл хьун я, шиирдив рахун
Пара шеъ кан жемир, зи ц1ар кьван я зун.
Къачурди эхцигнач, и кьиляй лугьун
Гел тахьуй лагьана, гелев вахкана