Халкьдиз еке савкьват я

Гьуьрметлу «Алам» журналдин редакция! Квез сифте камар мубаракрай! Квез и четин ва жавабдар кIвалахда чIехи агалкьунар хьурай «Алам»дин уьмуьр яргъи, рехъ бахтлуди хьурай.
Журналдин нумра интернетдай акурла, зун фикир ийиз амукьна, яраб им гьи чIалал акъатзаватIа лугьуз. Чир хьайила, заз пара хвеши хьана. Лезги чIалал акъатзавай журналар газетар, ктабар гьикьван пара хьайитIа, гьакъван хъсан я.
«Алам» журналдин кьве нумра кIелна. Макъалайра гьам тарихдин, гьам чIалан меселаяр къарагъарнава. Куьне лезги халкьдин култура, ацукьун-къарагъун вини дережедиз хкажунин кардик чIехи пай кутазва. Куьне гъиле кьунвай, гьялиз канзавай кьилин меселайрикай сад чIалан михьивал хуьн я. Ам хъсан кIвалах я. ЧIалаз талукь макъалаяр куь журналра гзаф ава. ЧIалан михьивал хуьнин патахъай зи фикирар чи тIвар-ван авай зари Арбен Къардаша вичин макъалада къалурнава. Зун гьадахъ галаз рази я. Чи лезги алимри чIалан винел кIвалах тухванва ва тухузва. Литературадин чIал сад хьун герек я.

Алай чIавуз, зи фикирдалди, кар алай кIвалахрикай сад лезги журналарни газетар кIелдайбур гьазурун я. Газетарни журналар киоскра хъипи хьана амукь тавун патал алахъна канзава. Ам чи мектебрин лезги чIалан муаллимрин кIвалах я. КIцар райондин вири мектебра лезги чIалал тарсар физва. Тарс тухун патал улубар герек я. Са классда са улубни тахьайла, тарсунин еридикай рахун герек къвезвач. Заз чизва, райондин школайра тарсар хъсан тухуз алахъзавай муаллимар гзаф ава. Муаллимдиз тарс тухудай шартIар авач. Абурун кIвалахдиз фикир гун лазим я, абуруз датIана куьмек герек я. Муаллимдин гъиле са тайин тир программа авач, кIелунин план авач. Лезги чIалан тарс «Самур» газетдай, «Чи рагъ» журналрай тухузва. «Алам»дин редакция школайриз мугьман хьайитIа хъсан я.
Лезги чIалан тарсариз кьецI гузвайбурурукай садни чи  диде-бубаяр я. «Лезги чIалакай вуч ийизвайди я, ам гьиниз кьван я, чи аялриз лезги чIал чизвайди бес я,» — лугьузва пара диде-бубайри. ГьакI тирвиляй аялрин лезги чIалаз авай гьевес рекьизва. Сад лагьай классда кIелзавай аялдин дидеди лугьузва: «Ингилис чIал ваз герек къведа, лезги чIалакай вуч ийизва?» Ихьтин гафарилай кьулухъ аялди лезги чIалан улуб гъиле кьан хъийидач.
Заз чиз, инсандиз виридалайни багьади вичин дидедин чIал я. Ам хкаждайдини жув я, агъузардайдини. Масадакай кефи амукьун дуьз туш.
Гьуьрметлу редакция! Куь журнал Самурдин гьам кефер, гьам кьибле пата авай чи халкьдиз еке савкьват я.
Квез хъсан рехъ хьурай!    

Лезги чIалан муаллим.

Добавить комментарий

Ваш адрес email не будет опубликован.