“Алам” лезги културадин журналдин цIийи йисан кьвед лагьай нумра кIелзавайбурун ихтиярдиз ганва.
Чи зурба сеняткар-актриса, манидар, режиссёр, Дагъустандин Халкьдин Артистка Дуьрия Рагьимова чавай къакъатун журналди лезги госдрамтеатрдин актёр, манидар Руслан Пирвердиеван рикIел хкуналди сифте чина чапнава.
«КцIар» газетдин редактор, лайихлу журналист Видади Севзиханован 60-йисан юбилейдиз талукь яз адахъ галаз «КцIар» хуьн зи бахтуниз аватна…» кьил ганвай жузун-качузун, Римма Сейлидин «Шагьдагъ» ВИА-дин 30-йисан юбилейдиз талукь «Шагьдагъ», Афродитадин аял, Демис Руссос» тIвар алай очерк, Камран Къурбаналийрин къелемдикай хкатнавай «Яран Суварин философия» эсседи цIийи тилитда чка кьунва.
«Лезгийрин сифте экран»-и макъалада шаир-журналист Вакъиф Муь-шкуьрвиди вич сифте редактор хьайи кьилди «Хачмаз» ТРК арадал атунин тарих, и редакцияди кьиле тухвай кIвалахар рикIел хкизва.
Профессор Ярали Яралиеван «Египтологияда еке дегишвал» кьил ганвай макъалада египетдин иероглофар кIелунин тарихдикай, тарихдин илимрин кандидат Фейруз Беделован «Лезгийрин космогоникадин кьатIунар» кьил алай макъала чи халкьдин къадим мифар арадал атуниз, тарихчи-журналист Ризван Ризванован «Лезгийрин метрологиядикай фолклордин материалар» кьил ганвай ахтармишун чи алцумунин кьадаррин тIварариз талукьбур я.
Журналист Гуьлера Камиловади чи зурба сеняткарар-РСФСР-дин Халкьдин Артист Мурадхан Кухмазов ва адан уьмуьрдин юлдаш Шемсижагьанан юбилейриз талукьарнавай «Кьисметрин бахтлу галкIун» очерк, режиссер, Азербайжан Республикадин халкьдин артист, профессор Жанет Селимовадин «Дагъустандиз сиягьат» рекьин къейдерни кIелзавайбуруз марагълу жедай материалар я.
Рения Къарибовадин «Мафии баде», журналист-этнограф Абир ЭчIехвидин «ЧIуран хуьр, чIур хьайи хуьр, ТIула ТIигьир, ТIигьирар…» кьилер алай макъалайра чи хуьрерин инсанрикай, тарихдикай ихтилат физва.
Филолог Зиятхан Мурадханован «Вучда вакай?» кьил эцигнавай макъала шаир-муаллим Мегьамед Мегьамедован уьмуьр ва яратмишунриз бахшнавайди я. Гуьгъуьнаваз шаирдин са цикл шиирарни ганва.
Журналдин и тилитдани поэзиядин чешнейриз чIехи чка ганва. Михаил Лермонтов дидедиз хьунин 200-йисаз талукь яз макъала ва шаирдин лезги чIалаз элкъ-уьрнавай шиирар, гьакIни Сажиддинан, Лале Садировадин чIалар, маракълу хабарар, рецензиярни и тилитдик акатнава.
«Кцlар» газет